UNA diz qu’IU nun entra dientro de la so estratexa d’alcuerdos

UNA continúa les conversaciones con otres fuercies y reafirma'l so apueste por algamar alcuerdos. Sicasí, afirmen qu’IU, “sofitu de la FSA”, nun entra dientro del “espaciu políticu asturianu”.

La Xunta Xeneral, órganu máximu decisoriu ente congresos d'Unidá Nacionalista Asturiana, ratificó'l sábadu pasáu'l so apueste plantegáu en payares del añu pasáu y aprobáu nel Congresu celebráu nel mes de marzu, sobre la necesidá de la presencia d'un espaciu políticu asturianu nes elecciones de 2011 que represente una alternativa real a les propuestes del PSOE, PP e IU.

Afirmen qu’énte les diverses informaciones aparecidas nos medios de comunicación nes últimes selmanes, deseen esclariar que la postura de la organización ye continuar coles conversaciones y contactos que mantuvieron nes últimes selmanes con otres organizaciones y persones, “pa estudiar con xenerosidá y flexibilidá la posibilidá d'ampliación del espaciu electoral, social y políticu plantegáu”.

Del mesmu mou, van intentar que los contactos se sigan realizando nun clima de máxima discreción, "tanto pa impedir filtraciones o informaciones que puedan enrarecer los procesos como pa evitar la creación de falses espectatives nel casu de que les conversaciones nun cuayen n'alcuerdos concretos”.

Asina, afiten que la so voluntá ye que los “hipotéticos alcuerdos” se basen nun consensu tanto de programa, en clave asturiana, d'esquierdes y ecoloxista, como de les persones escoyíes pa encabezar les candidatures.

Al empar, esclarien que l'espaciu políticu que quieren representar, ampliar y redefinir con otres organizaciones y persones ha d'oponer una alternativa al PSOE, al PP y a IU, “introduciendo un tercer espaciu na política asturiana que fraye col tradicional binomiu PSOE-IU/ PP”. Poro, señalen que la organización nacionalista nun considera a IU un posible actor nesti procesu, “yá que'l so papel na política asturiana ye'l de sofitu de les polítiques y el réxime de la FSA-PSOE”.