UNA quier qu’Asturies nun tenga nenguna rellación con Israel

UNA solicita un pronunciamientu de la Xunta Xeneral pa encamentar al Estáu a suspender rellaciones con Israel. Amás, esixen que’l Principáu rompa toa relación col Estáu hebréu.

Unidá Nacionalista Asturiana condena l'asaltu al barcu d'ayuda humanitaria, onde se provocaron un númberu de muertes de cooperantes entá ensin determinar. Dende'l puntu de vista d'UNA esti fechu enmárcase nuna violación de los derechos humanos d'Israel y del so despreciu dafechu al Derechu Internacional.

La organización considera cómplices d'estes actuaciones al Estáu español y a les instituciones europees, “que siguen mirando pa otru llau ante los crímenes d'Israel, calteniendo una cínica crítica a les constantes violaciones israelines al pueblu palestín, pero qu’al empar acompañen d'una intensificación de les rellaciones comerciales y diplomátiques col Estáu israelín”.  

Polo tanto, UNA cuida necesario condergar a tolos actores que nun collaboren col aisllamientu internacional d'Israel nos sos ámbitos de competencies, “hasta que cesen toles actividaes d'acosu y humildación del pueblu palestín, pa forzar la necesaria negociación y con ello llograr un Estáu palestín que pueda vivir en paz ensin ocupación israelina”.  

Nesti sen, UNA esixe al Gobiernu asturianu que dientro de les sos competencies remate toa collaboración o anule cualquier proyeutu de collaboración con Israel, si nun ye dientro de la busca de la paz colos palestinos, y esixa al Gobiernu central la suspensión de les rellaciones con Israel hasta que se someta a los mandaos de la ONX y opere dientro del Derechu Internacional.

“De lo contrario toa crítica a esti crime, como a tolos anteriores y futuros, d'Israel van ser meres falcatrúes diplomátiques pa nun reconocer lo que ye un secretu a voces, el sofitu del Estáu español y la XE a Israel y el despreciu absolutu escontra'l pueblu de Palestina”, afirmen.

Poro, UNA solicita al Parllamentu asturianu que vote una resolución pa encamentar al Gobiernu central a suspender les rellaciones con Israel pa que cada organización amuese “la so verdadera cara na ocupación de Palestina”.