El Ministeriu d'Interior avera a Villabona a seis presos d'ETA

Interior averó nos últimos dos meses a una docena de presos etarres a la cárcel de Villabona y la de Zuera en Zaragoza, los dos penales más afeutaos pola política de tresllaos.

Dende que'l Departamentu que dirixe l'Alfredo Pérez Rubalcaba entamó la so política de 'premios' y 'castigos' pa los presos de la banda tres la rotura de la tregua, estos dos penales tornaron nos principales llugares nos que poner en práctica esta estratexa, pese a que los últimos meses esta política tamién s'amplió a otres cárceles cercanes al País Vascu.
 
A la prisión de Villabona, los treslladaos nes últimes selmanes son Juan Ignacio Delgado Goñi y Sebastián Prieto Jurado -procedentes d'A Lama-; Andoni Díaz Urrutia -Soria-; Sebas Etxaniz Alkorta -Villena-; Arnatz Oiartzabal Ubierna -Navalcarnero (Madrid)- y Gabriel Zabala Erasun -Ocaña II (Toledo)-.
 
Los presos treslladaos dende'l pasáu mes d'abril hasta la cárcel de Zuera son Josu Amantes, Aitor Herrera Vieites y Iñaki Etxeberria Martín, 'Mortadelo' -procedentes de Castelló Albocasser-; Iñaki Bilbao Beaskoetxea, 'Iñaki de Lemona' -Topas (Soria)-; Jokin Errazti Elorza -A Lama (Pontevedra)- y José Jabier Zabaleta Elosegi -Puerto III (Cádiz)-.
 
En total son 12 movimientos a estes dos cárceles, que nun lleven implícitu un intercambiu, puesto que, no qu'a salíes se refier, namás hubo tres; les qu'afeuten al ex vocal de la Mesa Nacional de Batasuna Anjel Mari Elkano, y otros dos dirixentes abertzales como Mikel Zubimendi y Arantxa Santesteban, en llibertá baxo fianza dende mediaos del pasáu mes d'abril.
  
No referente a los perfiles de los beneficiaos destaquen veteranos como Amantes Arnaiz, de nomatu 'Txirlas'. Bilbaín de 39 años, integróse n'ETA en 1982 y formó parte del comandu 'José Martí', qu'en 1983 asesinó a trés emplegaos de la sede central del Banco Vizcaya y resultaron firíes 12 persones. Dempués escapó a Francia, onde foi oxetu d'un atentáu del GAL nel que resultó firíu grave. Formó parte del aparatu políticu de la banda terrorista ETA, dende 1986 hasta que resultó deteníu en 1992 pola Policía francesa en Nantes.
  
En septiembre de 1999, cuando'l Ministeriu d'Interior adoptó midíes penitenciaries pa 110 presos, a Amantes treslladáronlu dende la prisión de Navalcarnero (Madrid) a la de Villabona y depués hasta tuvo ente 1999 y el 2005 en Nanclares de Oca (Álava). Pero nos últimos años alloñárenlu otra vuelta, pasando peles cárceles de Soria, Puertu I (Cádiz) y Castelló Albocasser.
  
'Txirlas' va compartir prisión con otru históricu pistoleru como Iñaki Bilbao Beaskoetxea, de nomatu 'Iñaki de Lemona', condenáu ente otres acciones pol atentáu contra la casa-cuartel d'Araya (Álava) el 2 de payares de 1984. L'Audiencia Nacional tamién lu condenó'l 21 d'avientu del 2001 por ametrallar un camión en 1984, conducíu por un ciudadanu francés. De 40 años, garráronlu en Francia'l 31 de mayu de 1992.
 
Un espulsáu por Chávez

No referente a los acabantes de llegar a Villabona hai veteranos como Sebastián Etxaniz Alcorta, 'Sebas', espulsáu de Venezuela'l 17 d'avientu del 2002 con destín a España. Mientres la so militancia n'ETA llegó a participar nuna ventena d'atentaos saldaos con 17 muertos ente los años 1981 y 1985, nuna de les époques más sangrines de la banda.
  
Tamién lu espulsaron de Nicaragua en 1993, pa que depués lu xulgaren n'España pol asesinatu múltiple cometíu'l 4 de mayu de 1983 nun garaxe del barriu bilbaín d'Indautxu, causa na que resultó absueltu. Al nun tar imputáu en nengún otru sumariu punxéronlu en llibertá y escapó a dalgún país d'Iberoamérica. Asitiáronlu en Caracas (Venezuela) n'abril de 1997.
  
Según fontes policiales, Etxaniz Alcorta formó parte d'un grupu d'etarres que, a les ordes de Luis Iruretagoiena, trabayó pa los servicios secretos del réxime sandinista en Nicaragua. Realizaben atentaos fuera de Nicaragua contra persones consideraes enemigues del réxime. Utilizaba la identidá de Rafael Castellón.
 
El compañeru de Castresana

Otru de los etarres lleváu a Villabona ye Prieto Jurado, deteníu'l 18 d'avientu de 1994 por integrar el comandu 'Nafarroa'. Yá en prisión treslladáronlu en 1996 al Conceyu de Bilbao  onde tomó posesión del so cargu de conceyal por HB. Tres la so toma de posesión, anuncióse-y que darréu quedaba inhabilitáu pola so condición de penáu, polo que lu llevaron otra vuelta a la prisión.
  
Delgado Goñi, de 59 años y deteníu en 1991, ta acusáu, ente otres acciones, d'intentar asesinar al teniente coronel Enrique Rodríguez Galindo con un paquete bomba. Xunto co él van cumplir condena na mesma cárcel José Antonio Díaz Urrutia, condenáu dientro del sumariu 18/98 y Arnatz Oiartzabal, el compañeru de 'comandu' d'Olaia Castresana cuando la etarra morrió manexando un artefactu.