Air Europa entama la llinia a Madrid pa competir col "preciu atracu"

El primer vuelu d'Asturies-Madrid llegó güei, a les 10.15 hores a Santiagu'l Monte pa competir colos precios d'Iberia, que son "un poco d'atracu", aseguraron dende Air Europa.

El presidente de Globalia, grupu al que pertenez Air Europa, Juan José Hidalgo, indicó que "esto antes yera un monopoliu y la xente agora va viaxar con tarifes competitives. Eso de qu'antes cobraren Asturies-Madrid lo que nós Madrid-Nueva York paezme un pocoñín d'atracu a los asturianos". Aseguró que "d'equí p'arriba vamos lluchar por ver lo que lleva'l mercáu, pero faciendo bien les coses"

Hidalgo manifestó "la so confianza na nueva llinia que va fletar cuatro conexones diaries ente Asturies y Madrid a un preciu que ronda los cien euros la ida y vuelta con aviones modernos y cómodos pal pasaxeru". Un Embrear Y195 va ser el que s'encargue de facer el trayectu y tien una capacidá un 33 por cientu menor a los convencionales, puesto que s'orixina l'asientu central pa una mayor comodidá, según indicó Hidalgo.

El presidente del Principáu, Vicente Álvarez Areces, aseguró que los cuatro enllaces que va fletar a diariu Air Europa "son un riesgu, pero tamién una oportunidá". Declaró que "en tiempos de crisis hai oportunidaes y hai que saber atopales" como fizo esta empresa.
  
Areces mostróse confiáu en qu'esta nueva conexón permita atrayer más turistes de Madrid a Asturies puesto que, nel 2009, 350.000 persones, que suponen el 21,59 por cientu de los turistes, veníen de ellí. Aprovechó pa dicir que l'aeropuertu tuvo l'añu pasáu 1.300.000 pasaxeros, "algo que nun foi nada malo, pero qu'hai que recuperar nel 2010".
  
Aludió al primer balance turísticu del añu, que se acabó con crecimientu "la primer vez en dos años". Mientres el primer trimestre del 2010, Asturies recibió casi un 5 por cientu más de turistes que nel mesmu periodu del 2009. La subida tamién se traduxo en más pernoctaciones, con un aumentu del 2,6 por cientu. "Calidá, profesionalidá y bon serviciu a precios accesibles son factores destacaos polos nuesos visitantes", afirmó Álvarez Areces.