Los ecoloxistes celebren el Día del Mediu Ambiente en L’Espartal

El próximu 5 de xunu ye’l Día Mundial del Mediu Ambiente y les organizaciones ecoloxistes celebren la fecha con una marcha pel campu dunar de L’Espartal, en Castrillón.

Les 19 organizaciones convocantes, informen que les dunes de L’Espartal foron en parte declaraes como Monumentu Natural pol Principáu, “el mesmu qu'en febreru refugó esa consideración a parte del territoriu a favor d'una pretendida urbanización”.

“Los innegables valores naturales del llugar obliguen a les autoridaes a exercer dientro de les lleis la so preservación eficaz, evidentemente ensin dexar retayos como los facilitaos pol Principáu qu'apocayá renunciu a defender lo público ensin caltener la integridá d'ún de los más valoratibles espacios naturales de la mariña asturiana”, afirmen les organizaciones.

Los ecloxistes van facer una concentración a les diez de la mañana nel Área Recreativa El Pinar (al llau del Institutu de Salinas). D'ellí los asistentes van movese al arranque de la marcha o bien n'autobús o bien en bicicletes.

La marcha, na cual van participar profesores de la Universidá d'Uviéu y otros profesionales, va cuntar con esplicaciones didáctiques alrodiu de los valores ambientales del Campu Dunar y de la redolada fluvial del Ríu Raices. Nestes actividaes va cuntase cola collaboración del Conceyu de Castrillón.