Bloco de Esquerda n'Uviéu

El vienres 4 de xunu, a les 19:00 hores, va facese nel salón d’actos del Cibercentru La Lila (C/ La Lila, nu 17, Uviéu) una charla a cargu de José Falcão, conceyal electu pela segunda vez nel conceyu d’Odivelas (Lisboa) y miembru fundador del Bloco de Esquerda. Na so conferencia va tratar d’esplicar la situación política d’anguaño en Portugal dende’l puntu de vista de la esquierda tresformadora.

El títulu ye ‘El Bloco de Esquerda portugués: una esperiencia d’agrupamientu anticapitalista n’Europa’. Ésti ye un partíu fundáu nel añu 1999 y que forma parte de la Esquierda Anticapitalista Europea.  Con una popularidá creciente na sociedá portuguesa, especialmente ente la mocedá, nes últimes eleiciones a l’Asamblea de la República de setiembre del añu pasáu convirtióse na cuarta fuerza política del país al obtener 16 diputaos.