Convoquen una concentración en Xixón contra l’ataque
|
31 Mayu, 2010 por Damián Barreiro
- Inicie sesión o rexístrese pa espublizar comentarios
El Comité de Solidaridá cola Causa Árabe convoca pa güei, 31 de mayu, una concentración en Xixón contra l’ataque israelín. Mientres, el Bloque y l'AAC anima a sumase al actu.
El motivu de la concentración, que va ser a les 20 hores nel Paséu de Begoña, ye refugar los asesinatos a 19 civiles, cometíos pol exércitu del Estáu d'Israel, al atacar la Fragata solidaria Llibertá, que tenía como destino apurrir 10 000 tonelaes d'alimentos, medicines y ropa a los millones de palestinos residentes na Faza de Gaza.
El Bloque y l'AAC animen a sumase
El Bloque por Asturies fai un llamamientu a la sociedá asturiana pa movilizase y sumase a la concentración. “La comunidá internacional nun puede dexar más asesinatos, nun puede dexar que se viole repitida y gratuitamente la lexislación internacional vixente, como asina tamién toa ética y moral intrínseca al ser humanu, atentando contra persones inocentes que nesti casu buscaben ayudar y tar al llau de los más desfavorecidos”, diz la organización.
El miembru de la Direición Nacional y Direutor de la Axencia Asturiana de Cooperación al Desarrollu, Rafael Palacios, diz qu’espera que güei seya un día d'inflexón y fáigase pagar finalmente al Estáu d'Israel “polos crimes contra la humanidá que vienen cometiendo va años a los güeyos de toos, pero que son callaos polos intereses y negocios de munchos países”.
Efrén d'Andrés
