Sánchez piensa que les encuestes reflexen que la sociedá pide eleiciones

Ovidio Sánchez dixo que les encuestes dan como vencedor n'Asturies a la so formación política por mayoría absoluta y amuesesn que la sociedá ta pidiendo eleiciones antemanaes.

Sánchez fixo estes manifestaciones güei, a entrugues de los periodistes en Sotrondio (Samartín del Rei Aurelio), en relación a la encuesta ellaborada por Sigma Dos pal diariu El Mundo, que reflexa que'l PP taría n'Asturies 10 puntos penriba del PSOE, lo que significaría la mayoría absoluta.

Dexando a un llau que les encuestes "hai que veles como una semeya d'un momentu determináu", Sánchez esplicó que los datos son previsibles porque la situación del país ye "absolutamente caótica". Dixo que'l presidente del Gobiernu, José Luis Rodríguez Zapatero, llevó a España "a la resquiebra", faciendo "lo que paecía imposible, porque esti país yera una de les potencies económiques del mundu hai seis años". La situación del país, calcó, "pide a voces unes elecciones".

Cascos
  
Preguntáu sobre los plazos pa la elección del candidatu a la Presidencia del Principáu y la posibilidá que seya a lo último l'ex ministru de Fomentu, Francisco Álvarez-Cascos, Sánchez esplicó que va ser "nel so momentu" y que ye la direición nacional del partíu la qu'han marcase los plazos. "Dende Madrid, como nós, van buscar lo meyor pal partíu", esplicó. Al so xuiciu, la elección del candidatu asturianu ye un procesu que "va acabar mui bien p'Asturies y p'España".
  
Sobre posibles diferencies col PP de Xixón si a lo último ye Cascos l'escoyíu, Ovidio Sánchez afirmó que "nun va haber problemes" porque'l candidatu del PP d'Asturies "va tener l'apoyu de tol mundu y va ser un magníficu candidatu, yá lo verán ustedes".