Día del Llibru Asturianu

Unos 19 muertos tres l'ataque israelín a la flota d'ayuda a Gaza

|

A lo menos 19 muertos pol asaltu n'agües internacionales de la flota solidaria a Gaza. Israel diz que foi culpa de los activistes y la ONX pide una investigación de los fechos.

El barcu que lideraba la flota, el 'Mavi Marmara', resultó atacáu a 65 kilómetros de la mariña de Gaza pente medies d'un abordaxe apoyáu por helicópteros. Según l'enviáu especial d'Al Yazira a bordu del barcu, Jamal Elshayyal, los militares israelinos utilizaron munición real mientres la operación.

L'Exércitu israelín aseguró nun comunicáu que les sos tropes "nun atacaron", sinón que se llendaron "a facer cumplir la orde del Gobiernu israelín d'evitar una entrada sin autorizar na Faza de Gaza que nun se coordinó coles autoridaes israelines". Coles mesmes, indicó que los sos soldaos abrieron fueu "depués d'enfrentase a les persones qu'había a bordu, que diben armaes con oxetos punzantes".
  
La organización que punxo en macha la flota, el Movimientu Gaza Llibre, aseguró que les tropes abrieron fueu "xusto depués" d'abordar el barcu.
  
Antes, l'Armada israelina contactara col capitán del 'Mavi Marmara' pa encamenta-y que s'identificare y informare del rumbu que llevaba'l barcu. Poco depués, dos buques de l'Armada hebrea arrodiaron a la flota, que cargaba unes 10.000 tonelaes de material humanitariu con destín a la Faza de Gaza.
  
La flota desafiara'l bloquéu impuestu por Israel a la Faza de Gaza y refugó la ufierta de les autoridaes israelines d'entregar elles mesmes l'ayuda  a los palestinos. "Esta flota ye una provocación que busca deslexitimar a Israel. Queríen entregar en Gaza una carga que podríen unviar al traviés d'Israel, como se fai diariamente", afirmó l'Exércitu.
 
Israel culpa a los activistes
 
El ministru y cabezaleru del Partíu Llaborista aseguró qu'Israel ta dispuestu a aceptar les consecuencies d'esti incidente y que va siguir defendiendo la so independencia. "Llamentamos qu'haya firíos, pero los organizadores y participantes del viaxe son los responsables", dixo Barak, que calificó la iniciativa de provocación política per parte de siguidores violentos d'una organización terrorista.
  
"Atacaron a los soldaos al llegar a ún de los buques. Algunos sufrieron firíes amás de la la grave violencia física exercida polos activistes", dixo. "Ante una situación de peligru pa les sos vides, los soldaos viéronse obligaos a emplegar midíes pa aventar al grupu", reconoció.
  
"La organización IHH, que ta tres esti barcu rebelde, ye un grupu violentu y radical qu'actúa baxo pretendíes actividaes humanitaries", esplicó Barak en referencia a la fundación humanitaria turca IHH (Insani Yardim Vakfi), principal responsable de la iniciativa solidaria con Gaza.
  
"L'Estáu d'Israel dirixióse a los organizadores primero que los buques salieren y mientres la so travesía, y convidólos a dirixise al puertu d'Ashdod y tresferir l'ayuda pa Gaza pa que la sometieren a controles de seguridá", esplicó. "Refugaron tolos nuesos pidimientos", dixo.
  
Barak eloxó a los militares implicaos nel abordaxe. "Conozo esti tipu d'operaciones y les sos posibles implicaciones y conozo a les unidaes implicaes y a los sos comandantes. Son lo meyor de la nuesa xente", afirmó.

"Los activistes dipararon"
  
El xefe del Estáu Mayor del Exércitu hebréu, Gabi Ashkenazi, esplicó mientres la mesma rueda prensa que los soldaos israelinos viéronse obligaos a emplegar fueu real. Ashkenazi destacó que namás hubo incidentes violentos nún de los seis buques de la flota abordaos mientres la madrugada.
  
Los activistes, según Ashkenazi, emplegaron barres de fierro y cuchiellos. "Inclusive dispararon con una arma que quitaron a ún de los militares", dixo. "Ta claro que los militares actuaron según requería la situación", repostió. Ahskenazi esplicó que los militares taben preparaos pa la misión, pero que "l'equipu antidisturbios nun yera bastante".
 
La ONX pide una investigación
 
El secretariu xeneral de la ONX, Ban Ki Moon, pidió una investigación detallada de la operación militar israelina contra la flota que pretendía llevar ayuda humanitaria a la Franxa de Gaza y que se saldó cola muerte de polo menos diez activistes.
  
"Ye vital qu'haya una investigación completa na que se determine esactamente cómo asocedió esti arramamientu de sangre", afirmó Ban en rueda prensa dende la capital ugandesa, Kampala.
  
Ban alcuéntrase en Kampala pa participar na Conferencia de Revisión del Tratáu de Roma, constitutivu del Tribunal Penal Internacional, que se celebra ente'l 31 de mayu y el 11 de xunu na capital ugandesa.
 
Noticia n'Al Yazira

Contador Estadistiques