UNA pide al Conceyu de Siero liderar la “llucha” contra Soto-Penagos

UNA animó al Gobiernu de Siero a liderar la oposición a la llinia Soto-Penaos, “non solo por ser ún de los conceyos más perxudicaos, sinon porque dispón de mecanismos pa facelo”.

Ante l’anunciu del nuevu gobiernu del PP en Siero, de promover otru estudiu d’impactu que compacte les llinies existentes nun corredor, el portavoz d’UNA, Faustino Zapico, dixo que “ye más de lo mesmo: desvistir santos pa vistir otros” y recordó qu’esto mesmo ye lo que se ta faciendo en Nava y Piloña y “anque afeuta a menos xente, consagra dos categorías de ciudadanos: unos con derechos y otros ensin ellos, amás d’agravar el problema medioambiental”.

Sicasí, apunta qu’otra cosa diferente ye l’anunciu de la edil d’urbanismu de Siero de promover un nuevu EIA acoyéndose a la sentencia del Tribunal Superior de Xusticia de Madrid, que n’abril de 2008 anuló l’aprobación del proyectu de Red Eléctrica y obligaba a la compañía a elaborar un informe ambiental conxuntu pa tol trazáu.

Nesi sen, Zapico diz que “naide se llame a engañu: esa sentencia promoviola l’anterior corporación de Piloña y anguaño naide solicitó la execución de la mesma, polo que ye papel moyao” y animó al PP a “facer fuerza pa llevala alantre”. “Evidentemente nun ye lo mesmo un ayuntamientu, con tolos mecanismos llegales ya institucionales de los que dispón que la llucha altruista d’asociaciones vecinales y medioambientales. Tolo demás son brindis al sol” manifestó.

El portavoz d’UNA, comparó’l conceyu de Siero col caxón de sastre de les infraestructures n’Asturies “pol abandonu de los gobiernos municipales, Siero ye un conceyu que desapaez embaxo de centros comerciales, autopistes, y llinies d’alta tensión ensin qu’heba nengún tipu de planificación de mediu y llargu plazu y onde les parroquies rurales y los vecinos son siempre los paganos”.

El voceru de la organización nacionalista dixo que’l proyeutu enerxéticu que defiende la FSA-PSOE, “capitaneada por Tini Areces y el sindicatu UXT”, ye propiu del sieglu pasáu, “totalmente opuestu a les directrices de la Unión Europea, pensáu pa enllenar el centru d’Asturies de centrales contaminantes que nun creen puestos de trabayu y de les que la sociedá asturiana nun consigue nengún beneficiu”.