Izquierda Xunida diz que la so paciencia “entama escosar”

La direición d’IX "sigui esperando" a que Jaime Rabanal unvíe la documentación sobre presupuestos y escenarios económicos, polo que la so paciencia "entama escosar".

La formación, socia de FSA-PSOE nel Gobiernu, quier los datos pa poder analizar les decisiones qu'en materia presupuestario tenga qu'adoptar nel Principáu, "llevamos esperando selmanes", esplicaron. D'esta forma, negaron qu'esista cualesquier tipu de negociación al respeutive, a pesar de qu'el mesmu Rabanal dixo nuna rueda de prensa que'l próximu plan d'axuste que prepara'l Principáu ta analizándose nel senu del Conseyu de Gobiernu, onde hai dos conseyeros d'IX.

En relación a esti asuntu, dende IX esplicaron que lo único que conocen sobre'l tema ye al traviés de los medios de comunicación. Sicasí, señalaron que sedría deseable que "a la tercer seya la vencida" y que a la fin el Conseyeru d’Economía y Facienda y el presidente del Principáu d'Asturies, Vicente Álvarez Areces, acepten una xubida d'impuestos a los ricos n'Asturies.

Según IX, tantu Areces como Rabanal opunxéronse a tomar esa midida nes dos últimes negociaciones presupuestaries, a pesar de qu'IX plantegó nos dos últimos presupuestos la xubida del tramu autonómicu del IRPF pa tolos que ganaren más de 6.000 euros. "Areces y Rabanal negáronse, prefirieron apostar por una política de barra llibre; esperemos que camuden pa 2010", sostuvieron.