Caxastur va tener el 75% de Banco Liberta

Banco Liberta, del grupu Caxastur, va tar participada nun 25% por Caxa Castiella-La Mancha (CCM) y nun 75% pola caxa asturiana cuando acabe la so integración.

Pa rematar el procesu, l'asamblea xeneral de CCM convocóse, en sesiones ordinaria y estraordinaria, el miércoles 30 de xunu col fin de decidir sobre la integración del negociu bancariu de la entidá en Banco Liberta y la so conversión en Fundación, informó güei la caxa a la Comisión Nacional del Mercáu de Valores (CNMV).

La convocatoria de l'asamblea recueye nel so puntu sestu les distintes actuaciones pal desarollu del plan de rescate de CCM", qu'inclúi, como principales finxos, l'acuerdu col Fondu de Garantía de Depósitos (FDG), la segregación del negociu bancariu de CCM y la so integración como unidá de negociu en Banco Liberta y, a lo último, la renuncia a la condición d'entidá de creitu y conversión en Fundación de CCM.
  
El proyeutu común de segregación, formuláu polos alministradores de CCM y del Banco Liberta'l 19 d'abril, consiste na segregación per parte de CCM "a favor de Banco Liberta del conxuntu d'elementos patrimoniales qu'integren, como una unidá económica autónoma, el so negociu ordinariu d'entidá financiera, incluyendo los negocios y actividaes parabancarios, recibiendo a cambiu acciones representatives del capital social de Banco Liberta", equivalentes al 25% del capital d'ésti.
  
Pa llograr el vistu buenu a la operación, ye necesario'l respaldu de dos tercios de l'asamblea, formada por 150 miembros, y ha cuntar con un quórum mínimu del 50%, al tratase d'un acuerdu estraordinariu.
  
El proyeutu cuenta col apoyu de tolos sindicatos y tamién col del PSOE, mientres que'l PP caltuvo una postura crítica sobre les causes que llevaron a la intervención de la caxa, pero nun reveló cuál va ser la so posición final na votación.
  
Una vez acabada la integración, Banco Liberta tará valoráu en casi 1.800 millones d'euros, con unos apropiaos ratios de solvencia tres la capitalización realizada nel senu del grupu Caxastur.
  
El negociu bancariu de CCM valorólu'l espertu independiente designáu pol rexistrador mercantil, KPMG Asesores, en 442,016 millones d'euros, según la información enviada a la CNMV, y que surde de la diferencia ente'l total activu de 23.211,238 millones d'euros y el total pasivu, de 22.769,222 millones.
  
A cambiu de la integración del negociu bancariu en Banco Liberta, la Fundación de CCM va recibir una participación del 25% nel bancu. Pa ello, va realizase una ampliación de capital en Banco Liberta, renunciando Caxastur a la so suscripción preferente, por importe nominal de 135,950 millones d'euros y una prima d'emisión de 306,065 millones d'euros, esto ye una cuantía total de 442 millones d'euros.
 
Optimizar la integración
  
La operación d'integración supón que Banco Liberta, a consecuencia del trespasu en bloque por sucesión universal de los elementos patrimoniales que formen el negociu bancariu de CCM, subrógase na totalidá de derechos, acciones, obligaciones, responsabilidaes y cargues del negociu bancariu segregáu, recibiendo los activos, los pasivos y los medios humanos y materiales vinculaos a la esplotación de dichu axuste bancariu.
  
Esta fórmula conlleva que, d'acordies colo dispuesto nel artículu 44 del Estatutu de los Trabayadores regulador del supuestu de sucesión d'empresa, Banco Liberta subrogaráse nos derechos y obligaciones llaborales de los trabayadores de la entidá segregada vinculaos a la unidá económica constituyida pol negociu bancariu de CCM oxetu de la segregación.
  
La elección d'esta fórmula "permite optimizar la integración del negociu bancariu nel Grupu Caxastur y potenciar les sinerxes a partir de les fortaleces del Grupu Caxastur nos ámbitos de "la solvencia, la xestión de riesgu, la estratexa de clientes y l'eficiencia", indicaron a Europa Press en fontes financieres.
  
El perímetru de segregación ye'l conxuntu d'activos y pasivos y elementos patrimoniales principales y accesorios que componen el negociu bancariu de CCM. Queden escluyíos los activos de la Corporación y de la Obra Social.
  
La Corporación industrial va quedar adscrita al FGD, qu'otorgó a Caxastur el mandáu de xestionar mientres siete años el procesu de lliquidación ordenada de los sos activos col fin de llograr el máximu rendimientu pa devolver los 1.300 millones inyectaos en cuotes participatives.