Chile estudia El Musel como entrada de los sos productos n'Europa

L'embaxador de Chile n'España, Sergio Romero Pizarro, dixo güei que tán estudiando que'l puertu d'El Musel seya entrada de los sos productos a España y la Xunión Europea.

Igualmente, defendió les oportunidaes de negociu qu'ofrez Chile a los empresarios asturianos y la estabilidá económica y xurídica pa garantizar la viabilidá de les collaboraciones. Asina lo dixo en declaraciones a los medios de comunicación nun descansu d'una xornada entamada pola Cámara de Comerciu d'Uviéu y FADE sobre les oportunidaes de negociu nel país suramericanu.

Romero indicó qu'hai negociu en sectores tan variaos como la construcción, les infraestructures, los servicios, la minería, o la informática. "Precisamos innovación y técniques de xestión, y tamién nos interesa'l modelu español d'educación", comentó.
  
D'esta manera, estimó la organización de la xornada dao que considera que los acuerdos d'inversión puen ser "bien fructíferos". "Chile ye un país estable pa invertir y encara un desafíu de reconstrucción que ye una oportunidá", dixo.
  
Amás, calcó en que Chile aspira a ser el primer país de Suramérica en ganar al subdesarrollu na próxima década, y animó a los empresarios asturianos y españoles n'invertir en Chile pa "desarrollar la so potencialidá".
  
La xornada cuenta cola participación d'unes 85 empreses asturianes de dellos sectores económicos interesaos en tar presentes nes actuaciones que se desarrollen nel país suramericanu, puesto que se prevé que mientres esti añu y el próximu'l ritmu de llicitaciones seya áxil y constante.
  
Al respeuto, el presidente de FADE y de la Cámara de Comerciu d'Uviéu, Severino García Vigón, indicó que la sesión enmárcase nel propósitu de mostrar la solidaridá con Chile y la voluntá de collaboración, asina como la intención de potenciar la internacionalización de les empreses asturianes, que considera más importante tovía en tiempos de crisis.