"La resolución de les Cortes obliga a tomar midíes col lleonés"

Nicolas Bartolomé diz que la resolución adoptada poles Cortes sobre’l lleonés nun fala esplícitamente de facer una Llei, “ye dalgo más modesto, pero obliga a tomar midíes concretes”.

El PP, PSOE y Grupu Mistu, aprobaron el pasáu miércoles 26 de mayu nes Cortes de Castiella y Lleón, una propuesta de resolución que fala d'impulsar el lleonés dientro del patrimoniu llingüísticu de la Comunidá, amás de poner en marcha un plan de midíes pa la so proteición específica.

Pal xurista lleonés Nicolas Bartolomé Pérez, nomáu va poques selmanes académicu de la llingua correspondiente, diz que la propuesta aprobada si trata la regulación del idioma en Lleón. “Pero esa regulación bien podría ser a traviés d’un simple reglamentu, que ye la vía pela que se ta desarrollando l’artículu 5.3 del Estatutu, el referíu al gallegu, especialmente nel ámbitu de la educación”, diz l’académicu.

Pa Bartolomé, el PSOE nun propunxo esactamente una llei, sinon dalgo más modesto: “que se cumpla’l mandatu estatutariu, pero nun solo nel aspeutu normativu, yá que tamién reclama una programación sistemática y coordinada empobinada a la promoción del idioma con iniciatives y actividaes de tou tipu”.

Sicasí, recuerda que’l Procurador del Común, el defensor del pueblu de la Comunidá,  nuna resolución dictada l’añu pasáu énte una quexa formulada pola asociación zamorana Furmientu, dixo que lo que correspondía facer a la Junta yera impulsar una iniciativa llexislativa col correspondiente proyeutu.

“El Procurador dixo que la regulación del lleonés tien que se facer con una llei, eso sedría lo deseable por afeutar la materia llingüística a derechos fundamentales, por siguir l’exemplu d’otres comunidaes como Asturies y Aragón, y por seguranza xurídica yá que la regulación reglamentaria  dexa les puertes abiertes a l’arbitrariedá del los gobernantes de turnu”, afirma.

Con too, el xurista califica de fundamental l’aprobación de la inicitiva y la unanimidá llograda, yá que tolos grupos votaron a favor. Diz qu’anguaño, tanto sociedá, como les más importantes instituciones de la Comunidá, “el Procurador del Común y les mesmes Cortes col votu del PP”, piden al Gobiernu una norma y un llabor de promoción qu’anguaño nun esisten. “La Junta nun pue siguir eludiendo la so responsabilidá na defensa del patrimoniu llingüísticu lleonés”, señala.

Si a la fin decidieran facer una norma como la Llei d’Usu asturiana, Nicolas Bartolomé diz que’l so conteníu podría ser asemeyáu al de la Llei de Llingües d’Aragón aprobada hai pocos meses. La concreción de les zones d’usu, “teniendo en cuenta que l’asturlleonés nun se fala en toles comarques zamoranes y lleoneses”, la enseñanza, la toponimia, la promoción cultural, la collaboración coles instituciones del restu del dominiu llingüísticu y la definición de los derechos llingüísticos de los falantes, son los puntos claves que tendría que tener la futurible llei.