Miles de franceses protesten contra los planes de retrasar la xubilación

Miles de trabayadores salieron a les cais de les principales ciudaes de Francia pa protestar contra los planes del Gobiernu de retrasar la edá llegal de xubilación más allá de los 60.

Los líderes sindicales franceses indicaron que les manifestaciones d'ayeri representen un primer pasu na llucha pa defender l'actual edá mínima de xubilación, una de les reformes emblemátiques del últimu presidente socialista de la República francesa, Francois Mitterrand, mientres que l'actual Executivu defende que nun tien más alternativa que la reforma.

Los tresportes funcionaben prácticamente con total normalidá y namás ente'l 10% y el 20% de los funcionarios sumáronse a la fuelga nes escueles, servicios postales y France Telecom. Pela so parte, una encuesta publicada pol diariu 'Le Parisien' ponía de manifiestu que'l 62% de los encuestaos taben dispuestos a manifestase.
  
Asina, una de les primeres manifestaciones, celebrada en Marsella, convocó a unes 80.000 persones, según los sindicatos, mientres que la Policía calculó'l númberu d'asistentes en 12.000 persones, cifres superiores a les d'una protesta anterior celebrada'l pasáu mes de marzu.  
  
"Namás una demostración de fuerza nes cais pue defender la xubilación a los 60 años y les conquistes sociales que Nicolas Sarkozy ta atacando metódicamente", afirmó Bernard Thibault, secretariu xeneral del sindicatu CXT.
  
Pela so parte, el misnitro de Trabayu, Eric Woerth, afirmó'l miércoles que l'actual edá mínima de xubilación "nun ye un dogma",  mientres que'l titular de la cartera de Facienda, Francois Baroin, señalaba que'l Parlamentu galu va debatir una reforma del sistema de pensiones a la vuelta de les vacaciones braniegues.  
  
Amás, el presidente galu, Nicolas Sarkozy, criticó la fuerte oposición a les reformes dende les files socialistes y afirmó que Francia "tendría menos problemes" si Mitterrand nun llega a rebaxar en 1983 la edá de xubilación.