Riopedre diz que les midíes de Gabilondo yá se tán aplicando

Riopedre diz que les midíes pa la meyora de la Educación presentaes por Ángel Gabilondo yá se tán aplicando n'Asturies. El Principáu va recibir un 2% del financiamientu global.

El Conseyeru d'Educación y Ciencia, José Luis Iglesias Riopedre, valoró de forma positiva la Propuesta pa la Meyora y Estabilidá del Sistema Educativu presentada pol Ministru d'Educación, Ángel Gabilondo, a les Comunidaes Autónomes na Conferencia Sectorial d'Educación.

La propuesta d'Ángel Gabilondo articúlase al traviés del Programa de Cooperación Territorial y contempla 14 midíes al redor de cinco grandes exes; la meyora de los rendimientos escolares, la modernización del sistema d'enseñanza, un plan estratéxicu de la Formación Profesional (FP), información y evaluación pa la meyora la calidá educativa y, pa finar, la formación permanente del profesoráu.

El Conseyeru d'Educación indicó que la práctica totalidá de les midíes del Programa de Cooperación Territorial presentaes por Ángel Gailondo yá taben en marcha n'Asturies,” y agora vanse a consolidar cola aportación del Ministeriu”.

Estes midíes tán acompañaes por un financiamientu global añal de 510 millones d'euros, que van tar cofinanciaos coles Comunidaes Autónomes. Asturies va tener una participación nesi importe global d'un 2% aprosimao, según lo que-y correspuende por población escolar.

José Luis Iglesias Riopedre tamién señaló que “independientemente de que'l pautu nun tuviera un bon final, sí qu'hai un alcuerdu de les comunidaes autónomes sobre los programes que tienen como oxetivu ameyorar la calidá de la Educación de los alumnos; neso si hai alcuerdu dafechu”.