Los farmacéuticos piden reuniones énte "un axuste preocupante"

El Colexu Oficial de Farmacéuticos solicitó con urxencia reunise colos responsables de la Conseyería de Salú y los Grupos Parllamentarios pa tratar el "preocupante" axuste del sector.

El presidente del Colexu, José Villazón, afirmó güei en rueda prensa que'l coleutivu nun contempla dir a la fuelga pero sí exercer presión frente a unes midíes que consideren "llenden" la capacidá de les oficines de farmacies pa caltener la viabilidá económica y l'empléu, según les inversiones y la calidá del serviciu.

Villazón mostró la comprensión de los farmacéuticos pola dura situación económica del país y de millones de ciudadanos, pero aun así dixo que se ven "obligaos" a refugar los recortes en farmacia. Al respecto, reconoció que'l nivel de facturación de les farmacies ye "eleváu" pero "la diferencia ente facturación y rentabilidá ye bien importante".
  
D'esta manera, comentó que de les 457 farmacies qu'hai n'Asturies, unes 80 facturen menos de 24.000 euros al mes y otres 80 menos de 40.000 euros, y qu'éstes s'atopen en posición de debilidá pa encarar los recortes farmacéuticos que plantega'l Gobiernu nos sos decretos RD04/2010 y RD08/2010.
  
N'Asturies nunca zarró una farmacia, pero Villazón alvierte que la situación a la que se van a ver conducíos ye "bien dura" y va facer "difícil de sostener" tantos puestos de trabayu como l'abrtura de delles botiques.
  
Al respeuto, la repercusión de les midíes nos puestos de trabayu, Villazón comentó que n'Asturies hai unos 1.700 empleos directos nes oficines de farmacies ente titulares, farmacéuticos axuntos y auxiliares técnicos. Asina, afirmó que los recortes propuestos suponen una cuantía mayor que'l costu llaboral d'un farmacéuticu axuntu, onde'l so xornal brutu añal ronda los 30.000 euros.

En concreto, José Villazón quiso resaltar que'l descensu del 16% nel beneficiu brutu de les farmacies súmase al 7,5% del descensu del valor de les esistencies nes botiques el próximu 1 de xunu --colo que cada farmacia va perder de media unos 3.500 euros-- y a los descuentos que dende l'añu 2000 les farmacies asturianes realicen na factura del Serviciu de Salú (Sespa) y que supón el 20% del so beneficiu brutu.
  
"Coles aportaciones del 20% mensual y la nueva rebaxa del 16%, va resultar mui difícil caltener unos estándares de calidá y un serviciu como los conocíos hasta la fecha", apunten dende'l Colexu.
    
Amás, el presidente del Colexu calcó en qu'un 13% de la facturación del Sespa refierse a les llamaes melecines 'ultra cares', qu'a les farmacies déxen-yos un "baxu" y a veces "nulu" beneficiu, polo qu'esi serviciu ye cada vez "más insostenible".
  
José Villazón, que tuvo acompañáu por Juan Roces y Reyes Comas como representantes de la Xunta de Gobiernu del Colexu, calcó en que "el gruesu de los beneficios" del sector farmacéuticu ye pa los llaboratorios (70%), y añadió que namás una ventena de botiques nel centru de les principales ciudaes asturianes cumplen col patrón de les grandes farmacies con importantes facturaciones, puesto que la mayoría son de medianu o pequeñu tamañu.
  
"Siempre fuimos partidarios de la contención del gastu sanitariu y l'usu eficiente de les melecines", resaltó Villazón llamentando que l'Executivu aprobara unos decretos "sin tener en cuenta la realidá del sector".