El BOPA publica los Decretos de Ribeseya y Teberga

El BOPA publica güei los decretos polos que se determinen los topónimos oficiales de los conceyos de Ribeseya y Teberga, qu’entamarán a ser oficiales mañana.

Ye de reseñar que nel Decretu de Teberga, tolos topónimos queden llegalmente namás cola so forma tradicional. Mientres que’l de Ribeseya determina que la capital del conceyu tien la doble denominación Ribadesella/Ribeseya y na parroquía d’El Moru tamién esiste la doble denominación d’El Carmen/El Carme.

Dende Política Llingüística indiquen qu’agora ta abiertu otru procesu al traviés del que, “de manera progresiva y acordies cola disponibilidá presupuestaria”, van dir renovando la rotulación y documentación oficial col envís de que los topónimos autóctonos figuren “a tolos efeutos”.
 
42 conceyos con Decretu oficial
 
Con estos decretos son yá 42 conceyos cola toponimia iguada. Facía ocho meses que nun s'espublizaba nengún Decretu nel BOPA. Asina, l´últimu conceyu que vio fináu’l so procesu de revisión topónimica foi Parres, el pasáu mes de setiembre de 2009.
 
Otros 17 conceyos tienen anguaño abiertu'l so espediente, tando en distintes fases de tramitación: Santu Adrianu, Ayande, Caravia, Castropol, Llanera, Tinéu, Valdés, Ponga, Illas, Villanueva d'Ozcos, Somiedu, Bual, Uviéu, Ibias, Salas, Samartín d'Ozcos y Santalla d'Ozcos.
 
Mientres que tovía nun entamaron el procesu; Cabrales, Candamu, Cuaña, Cuideiru, Eilao, Muros, Navia, Onís, Peñamellera Alta, Peñamellera Baxa, Pravia, Les Regueres, Santiso d'Abres, Sotu'l barcu y Villayón.
 
Pues ver los Decretos equí.