El tabacu provoca 566 muertes al añu

El vezu de fumar ta rellacionáu con 2.500 fallecimientos al añu n'Asturies. La Direutora Xeneral de Salú Pública, Amelia González, encamienta a los fumadores a pidir ayuda al médicu.

González ufiertó ayeri una rueda de prensa, por cuenta de la celebración el próximu día 31 de mayu del Día Mundial ensin Tabacu, na qu'espunxo dellos datos en rellación cola situación del tabaquismu n'Asturies. La Direutora Xeneral tuvo acompañada pol coordinador del Grupu Atención al Tabaquismu de la Sociedá Asturiana de Medicina Familiar y Comuñal (Samfyc), José Manuel Iglesias Samartín; pol Presidente del Colexu de Farmacéuticos d'Asturies, José Villazón; y pol Xefe de la Unidá de Coordinación del Plan Sobre Drogues de la Conseyería de Salú, José Ramón Hevia.

Según datos apurríos por Amelia González, n'Asturies el patrón de consumu de tabacu ye paecíu al del restu del territoriu estatal, ensin grandes diferencies nos principales indicadores de prevalencia. Na Encuesta de Salú p’Asturies correspondiente al añu 2008, el 27,8% de la población reconoz que fuma diariamente y el 30,4% diz ser fumadora. Estes cifres suponen un descensu en rellación cola Encuesta de Salú de 2002, qu'asitiaba nel 32,5% el total de fumadores asturianos.

La Directora Xeneral de Salú Pública destacó que'l tabacu ye causa directa del cáncer de pulmón, que produz una media de 566 fallecimientos al añu n'Asturies. Tamién señaló que la Conseyería trata'l problema del tabaquismu dientro del Plan de Drogues porque “el tabacu ye una droga como les demás, non un viciu” y apostó por sumar esfuerzos en tolos escenarios, tantu nel sanitariu, como nel educativu y nel comuñal, p'avanzar na prevención del tabaquismu y la promoción de la salú.

Amelia González animó a tolos fumadores a que pidan ayuda al so médicu de familia pa dexar el tabacu y destacó que ye una droga que puede dexase ensin necesidá d'ayuda farmacolóxica, y que'l Serviciu de Salú pon a disposición de los fumadores recursos abondos pa toos aquellos que quieran dexalo.  

Mientres la rueda de prensa, la Direutora Xeneral incidió tamién na necesidá de que profesionales sanitarios y farmacies tean implicaos nes iniciatives pa promover la deshabituación tabáquica y la xeneralización del conseyu antitabacu, polo qu'estimó la collaboración de la Sociedá Asturiana de Medicina Familiar y Comuñal (Samfyc) y del Colexu de Farmacéuticos.

Dimensión del problema

N'Asturies fuma'l 30,4% de los mayores de 16 años. El 27,8% fuma diariamente (unes 269.000 persones) y el restu, un 2,6%, fuma de manera ocasional. Fumen más los homes (34,7%) que les muyeres (26,4%), y la proporción d'homes exfumadores ye tres vegaes superior a la de les muyeres, sacantes nel grupu d'edá más nueva (16-19 años).

La mortalidá atribuyible al tabacu tien unos 2.500 casos añales. Mientres l'añu 2008, el vezu de fumar foi la causa de 2.458 fallecimientos n'Asturies, de les que 1.737 seríen homes y muyeres les 721 restantes.  

La situación nos mozos

El tabacu ye, tres l'alcohol, la segunda sustancia más consumida polos estudiantes asturianos de 14 a 18 años. Según los últimos datos de la Encuesta Estatal sobro Usu de Drogues n'Enseñanza Secundaria (Estudes 2006), un 43,7% de los mozos declara consumilo “dalguna vegada na vida”. Daqué más d'un terciu afirmen probalo nel "últimu añu" y un 28,5% nel “últimu mes”. El porcentaxe de fumadores diarios asítiase nun 13,3% según l'estudiu referíu.