UNA prevé “descontrol absolutu municipal” poles midíes de Zapatero

La responsable de política municipal d'UNA, Carolina Díaz, treslladó la esmolición pol "descontrol" de la xestión nos conceyos qu’entienden van traer arreyaes les midíes del Estáu.

Carolina Díaz preve que les midíes anunciaes pol gobiernu Zapatero pa llimitar el créditu nes entidaes locales “encaxa bien mal col conceutu d'autonomía municipal reconocida constitucionalmente” al tiempu que “va suponer el descontrol absolutu na xestión municipal, porque les distintes entidaes locales van entrar nuna carrera hasta final d'añu pa empeñase y a partir del 2011 zarraráse la capacidá de realizar proyeutos que pueden ser básicos pa desenvolver económicamente una localidá”.

Per otra parte Carolina Díaz denunció que se tome una midida pa tolos conceyos, cuando la situación de les diferentes entidaes locales del Estáu nun ye comparable, colo que tán castigando a los conceyos más aforradores por culpa de los conceyos que más s'empeñaron” y destaca'l casu de Madrid que ye un conceyu con “una delda escandalosa y agora quieren que polos sos escesos y el d'otros conceyos perxudiquemos toos”.

Dende UNA reclamen que se garantice recursos abondos a les entidaes locales, “porque son instituciones que tienen la obligación llegal de prestar unos servicios públicos y vemos cómo nun se tán estableciendo mecanismos realistes pal so financiamientu”.

Afirmen qu’esto foi salvándose gracies a la burbuya inmobiliaria y a un control pocu estrictu del urbanismu pa poder recaudar más impuestos, “pero cola pinchada de la burbuya vuelve a quedar patente'l déficit crónicu de los conceyos y la rempuesta de Zapatero ye llinda-yos el créditu ensin solucionar el problema del so financiamientu primeramente”.

Califiquen la situación de ridícula y tremendamente inxusta, “porque a la fin la ciudadanía ye la que va sufrir el recorte más significativu como usuaria de los servicios públicos dependientes d'entidaes locales. Poro, son les persones con más dificultaes los que más precisen d'esos servicios”, concluyó Carolina Díaz.