El Principáu autoriza la firma del primer pautu pol Arte Asturianu

El conveniu va reforzar el caltenimientu y puesta en valor del Arte Asturianu ya inclúi compromisos del Ministeriu de Cultura, el Gobiernu del Principáu, la Ilesia asturiana y los conceyos.

Esti conveniu, según informó la Conseyera de Cultura y Turismu, Mercedes Álvarez González, surde de la necesidá d'ameyorar dellos aspeutos rellacionaos cola xestión del Arte Asturianu, reforzando'l caltenimientu y restauración de los monumentos ya implicando nel desenvolvimientu d'una política integral a les distintes alministraciones y entidaes que caltienen relación direuta “o cunten con ún de los valores singulares y más significativos del patrimoniu español y que, al nuesu xuiciu, merez la máxima puesta en valor y espardimientu”.

El conveniu regula les actuaciones y responsabilidaes a les que tien que facer frente cada parte. Según los compromisos que figuren nel testu, la Ilesia va encargase del caltenimientu, custodia y atención al públicu de los distintos bienes,  mientres que'l Gobiernu d'Asturies va encargase de la investigación, restauración y promoción, en collaboración col  Gobiernu d'España. A lo último, los conceyos van responsabilizase de la meyora de les redolaes, garantizando la so llimpieza, seguridá y vixilancia.

El Gobiernu del Principáu d'Asturies asume nesti Conveniu'l compromisu d'impulsar la investigación, restauración y promoción d'estos monumentos, pa lo cual va invertir una cantidá de 560.060 euros, procedentes de los Presupuestos Xenerales del Principáu d'Asturies pa 2010.

El Ministeriu de Cultura comprométese, pela so parte, a realizar una inversión de 390.000 euros, mientres que l'Arzobispáu d'Uviéu y los distintos conceyos (Uviéu, Colunga, Pravia, Santu Adriano, Les Regueras, L.lena y Villaviciosa) comprométense a desenvolver una serie d'actuaciones tendentes a ameyorar la situación de los mesmos y de les sos redolaes de protección.

Según señaló Mercedes Álvarez, gracies al alcuerdu del Conseyu de Gobiernu, Asturies ta más cerca de suscribir el primer pautu pol Arte Asturianu “nun añu, precisamente, cargáu de simbolismu porque celebramos 25 años de la inclusión de los principales monumentos nel llistáu de Patrimoniu Mundial de la UNESCO”.