Los altos cargos tienen "les retribuciones más baxes d'España"

Ana Rosa Migoya dixo qu'Asturies foi "prudente nel gastu" y los altos cargos tuvieron siempre "unes retribuciones apropiaes". Nesti momentu, "les más baxes d'España".

La vocera del Executivu, que forma parte del xuráu del Premiu Príncipe d'Asturies de Comunicación y Humanidaes que se falla mañana n'Uviéu, fixo estes declaraciones a los periodistes enantes del entamu de les deliberaciones nel Hotel de la Reconquista de la capital del Principáu.

"Si garra la tabla de retribuciones d'altos cargos de les Comunidaes, el presidente, los conseyeros y los altos cargos asturianos tán al final, y arguyosos d'ello", aseguró. Defendió qu'esa austeridá afeuta tamién a los medios materiales de los que disponen los integrantes del Executivu pal desarrollu de les sos funciones, y que son "mui adecuaos, llendaos y prudentes nel gastu". "Nada que ver con otres comunidaes autónomes que faen recortes porque partíen d'una muncho más esparatada", dixo.
  
Esplicó que les Conseyeríes d'Alministraciones Públiques y Economía trabayen xuntes "nuna propuesta concreta sobre amenorgamientu del gastu de la que van informar de forma oportuna, tresparente y con tolos detalles", una vez llegáu'l momentu. Al respeuto, indicó que de momentu ta estudiándose'l Decretu y viendo "el marxe" que tien el Gobiernu asturianu.