UNA fai un llamáu pa que seya’l pueblu quien decida

Faustino Zapico dixo qu’anguaño l’enemigu d’Asturies taba na propia Xunta Xeneral y recordó la “llección moral” de los revolucionarios de 1808: “un pueblu uníu ye cuasi invencible”.

Asina s’espresó’l voceru d’Unidá Nacionalista Asturiana nun actu celebráu ayeri na Corrada del Obiespu d’Uviéu, col que la organización recordó la rebelión del pueblu y la declaración de soberanía de la Xunta Xeneral, que nun reconocieron el mandu francés y entamaron la guerra. Un actu qu’UNA lleva faciendo dende la so refundación y que quier brindar un homenaxe a los revolucionarios de 1808, dalgo que como indicaron reivindicó  nos años 70 Conceyu Bable.

Dende l’agrupación nacionalista tamién recordaron qu’en 1808 ñació la bandera asturiana, recuperada nos años 70 pol propiu Conceyu Bable y anguaño ún de los símbolos más conocíos del país. Una d’eses primeres banderes imprentaes pola asociación madre del asturianismu modernu, cubría l’atril dende’l que se fixeron les intervenciones del actu.

En nome de l'Asociación 25 de mayu participó Paco Mori, militante de la UNA fundada en 1989. El vieyu militante asturianista calificó de vergüenza que los gobernantes tengan la fecha apartada “como si fora dalgo despreciatible”.

Asina, animó al movimientu nacionalista a trabayar pa recuperar la fecha “y que los mios nietos y los vuesos fíos puean venir equí a conmemorar el 25 de mayu con dalgo más de pueblu, que ye lo que necesitamos”.

Mientres que Faustino Zapico recordó que dende’l movimientu asturianista lleven munchos años reivindicando la fecha. Señaló que fai 202 años había un pueblu pidiendo la declaración de guerra a Francia “ensin esperar lo que diben facer los demás”.

Zapico dixo qu’anguaño la Xunta Xeneral sigue llevando’l mesmu nome, la bandera asturiana sigue tando ehí y hai políticos que como dalgunos en 1808 “xugaben al doble discursu; diciendo una cosa pal pueblu y otra nos pasillos, siendo rebeldes pero en realidá sometíos al amu d’Uviéu o Madrid”.

Sicasí, recordó que’l pueblu nun ye’l mesmu que’l d’aquel mayu de 1808, “agora somos un pueblu que ta a la espera pa ver lo que fai la nuesa clase política y ver si-yos facemos casu o non”. Poro, el voceru d’UNA afirmó que dende l’asturianismu políticu taben lluchando pa que’l pueblu nun espere a lo que digan les clases dirixentes y seya quien decida lo qu’hai que cambiar.

“Anguaño ye más importante que nunca reivindicar esi espíritu revolucionariu de 1808. Güei l’enemigu nun ye francés, l’enemigu ta nes instituciones financieres, nel Gobiernu español, na propia Xunta Xeneral, anguaño de cartón-piedra. Cuando’l pueblu ta uníu y ye consciente de la so fuercia ye cuasi invencible, esa ye la llección moral de los homes y muyeres de 1808”, finó Faustino Zapico.