FSA, PP y empresarios felicítense pola fusión de Caxastur

Javier Fernández amosóse satisfechu pola seguridá pal aforru de los asturianos que supón la fusión de Caxastur. Mientres, dende IU pidieron que la caxa nun se desvincule del país.

El secretariu xeneral de la FSA, Javier Fernández, destacó la dimensión qu'algama Caxastur, tres la fusión fría con CAM, Caja Estremadura y Caja Cantabria, que la asitia como "segunda en valor por detrás de La Cixay tercer en volume de recursos tres la caxa catalana y Caja Madrid". "Tamos falando d'una entidá bien consolidada, que na situación financiera actual dio un pasu alantre bien evidente", señaló Fernández, al traviés de la web del organismu.

Nes sos declaraciones, destacó tamién la esixencia del Bancu d'España de que fuera Cajastur la que liderara la operación y el nomamientu de Manuel Menéndez como conseyeru delegáu, cargu executivu de la que va ser "la tercer caxa del país". Al so xuiciu, el fechu "sofita los nomamientos propuestos pol Grupu Socialista pa los órganos de xestión de la caxa asturiana y designar pola so profesionalidá, como Manuel Menéndez".

Pela so parte, el voceru del Grupu Parllamentariu Socialista, Fernando Lastra, señaló que la operación confirma la decisión de los socialistes d'apostar pola xestión profesionalizada. "Tamos arguyosos y satisfechos de que los xestores que tán al mandu de la entidá dieren amueses de nuevu d'una alta capacidá y de una gran solvencia".

"Siempres diximos, y siguimos calteniendo, que la responsabilidá de los políticos ye escoyer bien a los representantes nes caxes ye bien importante y al mandu de Caxastur hai un equipu humanu bien solvente y profesional, lo que llevó al ésitu d'esta operación", señalaron fontes del Grupu.

"Los socialistes dimos sobraes amueses de que tomemos les decisiones pensando nel interés de la caxa, na profesionalización y en crear equipos solventes. Otros igual piensen otra cosa, pero la nuesa decisión foi siempre esa y creo que güei tenemos un exemplu claru de lo que significa optar por xestores profesionales", añedieron.

Pa Lastra, l'alianza traduzse en "allegría p'Asturies" y "cierta esperanza pa la recuperación económica, pa la estabilidá del sistema financieru y pa los nuesos intereses económicos".
 
PP: "L'ésitu vien pola llei contra Areces"
 
El presidente del PP d'Asturies, Ovidio Sánchez, felicitó güei a tolos asturianos y a la entidá financiera Caxastur por "pilotar el procesu de reconversión de les caxes" gracies a la Llei de Caxes "contra Areces", del añu 2000. "Enllénanos d'arguyu y felicidá; Felicitamos a Caxastur y sofitámosla en toes estes operaciones", manifestó.

El voceru de los populares consideró que Caxastur dio anguaño "les meyores noticies" al Principáu con operaciones como la de Hc, l'absorción de Caja Castiella-La Mancha y agora un procesu que "va dar llugar a la tercer caxa d'España y al quintu grupu financieru español".

Un ésitu qu'atribuyó al trabayu de la entidá y del so presidente, Manuel Menéndez, dende fai más d'una década, de el que destacó la so "ambición" y el so "rigor". Al so xuiciu, estes cualidaes dexaron que la caxa, nel puestu 21 o 22 a nivel estatal, pasara a liderar los procesos de les caxes n'España. "Cuando les coses fáense bien, les resultancies son bonos", destacó.

Sánchez recordó que nel añu 2000 el presidente del Principáu, el socialista Vicente Álvarez Areces "espulsó" de la caxa a Menéndez, a el que el PP caltuviera, lo que constituyó "un terrible escándalu", que pudo llevar a Caxastur a "un derribadoriu".
 
IU esixe vinculación con Asturies
   
El Coordinador d'IU d'Asturies pidió a la entidá asturiana que nun arrenuncie a ser un motor de desenvolvimientu pal país, asina como que la operación non desvirtúe les característiques propies de caúna de les caxes.

Iglesias considera "una bona noticia" que Caxastur estableza aliances pa presentar una masa crítico financiera porque na actual reestructuración del sistema financieru y de les caxes d'aforros, consiguir, siquier, un tamañu mediu supon "una garantía".

Sicasí, destaca la importancia de que la operación axunte requerimientos talos como que nun se pierda la vinculación de la entidá con Asturies; que nun s'asuma riesgos previos d'otres caxes porque podría significar "complicaciones pa Caxastur" y que cola operación non se desvirtúen les característiques que son propies a les caxes d'aforros.
 
Coles mesmes, el líder d'IX confesó la so esmolición pol alcuerdu ente'l PSOE y el PP sobre la participación d'accionistes privaos nes caxes, yá que significaría "poner en riesgu a les entidaes y la so vinculación colos recursos del territoriu onde nacieron".

Los empresarios contentos

El presidente de la Federación Asturiana d'Empresarios (FADE), Severino García Vigón, treslladó güei la so felicitación y "más cordial norabona" al presidente de Caxastur, Manuel Menéndez, y al so equipu, por saber liderar un procesu que "yera necesariu y que s'executó cola solvencia a la que Manuel Menéndez yá nos tien acostumaos".

Al traviés d'un comunicáu, el presidente de la patronal asturiana valoraba asina l'alcuerdu alcanzáu ayeri. "Lleer esta bona noticia, nun momentu en que les bones noticies nun abonden, supón dalgo bono", sorrayó.