UNA celebra'l 25 de mayu "mirando al futuru del país"

UNA anima a celebrar el 25 de mayu mirando al futuru pa facer un país más xustu y más nuestru, “celebrámoslo pa saber qu’esti pueblu pue ser l’únicu amu del so futuru”.

La organización diz que la fecha del 25 de mayu supón la conmemoración d’un de los fechos más importantes na Historia asturiana cola proclamación de soberanía, la rebelión del pueblu asturianu y la creación de la nuestra bandera.

El 25 de mayu de 1808, la Xunta Xeneral proclamóse soberana, declaró-y la guerra a Francia, ponía embaxadores n’Inglaterra pa solicitar ayuda militar y entamaba la formación del Exércitu Defensivu Asturianu.

“El 25 de mayu ye un día que tenemos que celebrar y recordar porque supunxo un procesu d’autodeterminación colectiva afincáu nun fondu sentimientu identitariu, exemplificáu na denominación del Exércitu y na criación de la bandera asturiana azul y oru que tovia utilizamos güei los asturianos”, apunten pa finar.

Los actos colos qu’UNA quier celebrar la fecha van entamar a les 20.30, con una ufrienda floral de la Xunta Executiva na puerta de la Sala Capitular (Corrada del Obispu), llugar onde la Xunta Xeneral realizó la proclamación de soberanía en 1808.

Darréu vendrá una llectura de poemes rellacionaos col acontecimientu de poetes asturianos representativos de distintes xeneraciones. Amás del saludu de militantes de Conceyu Bable y del asturianismu nos 70 y 80, nel que van comentar el procesu de recuperación de la bandera asturiana.

Del mesmu mou, l’actu cuntará coles intervenciones del voceru d’UNA-Mocedá, Belarmino Álvarez, y del voceru de la Xunta Executiva Nacional d'UNA, Faustino Zapico, qu’amás ye historiador y autor del llibru "La revolución de 1808".

Piesllará l’actu una pieza de gaita y la ‘Cena 25 de mayu’, que va facese nun local (C/ San Antonio esquina Calle de la Rua) asitiáu nel llugar onde se produxo'l primer motín que llevaría al posterior llevantamientu. Estos actos enmárquense na reivindicación que fai la organización de la fecha, que soliciten qu’entre dientro del calendariu festivu.