Palacios: “Ye curioso l’interés porque marchemos de quien nun nos vota”

“Cuantos más espacios ocupemos, menos espacio tien la FSA, ye curioso l’interés porque salgamos del Gobiernu por parte xente que nun son los nuesos votantes”, afirmó Palacios.

Nun alcuentru dixital colos llectores de 'La Nueva España', el direutor de l’Axencia Asturiana de Cooperación afirmó que gracies a tar IU-BA-Verdes nel Conseyu de Gobiernu d’Asturies puen tratase temes como la incineradora, “si nun tuvieramos nin s’aldericaríen”.

Sicasí, señaló que nun se pue tar nun gobiernu a cualesquier preciu y dixo que, como s’aprobó nel Congresu Nacional del Bloque, tán dispuestos a dexar el Principáu. Palacios afirmó que’l so partíu pue trabayar dende fuera de les instituciones, “colos movimientos sociales y nel trabayu día a día na cai”.

“El camín que tamos percorriendo pensamos que ye necesario pal Bloque y pa la esquierda asturianista, lo que nun díbamos facer ye sentamos al lláu del camín a ver como lo percorren otros. El tiempu, dará y quitará razones”, señaló Palacios.

Futuru del asturianismu

El miembru del Bloque por Asturies refirióse tamién al futuru del asturianismu de cara a les eleiciones de 2011, depués de que’l so partíu decidiera abrir un procesu de diálogu con toles fuerces polítiques y sociales dispuestes a conformar una alternativa d´esquierdes, asturianista y ecoloxista lo más amplia posible.

Rafa Palacios afirmó que les eleiciones del 2011 marquen el fin d’un ciclu políticu n’Asturies y tienen que ser el principiu d´otra forma distinta de rellacionase ente les organizaciones “que compartimos munches coses”. Dixo, amás, sentise esperanzáu col futuru.

Sobre la posible participación del Partíu Asturianista nesa posible xuntura del asturianismu, Pacios afirmó que les organizaciones polítiques nun son incompatibles si son capaces de llegar a alcuerdos de mínimos que permitan avanzar.