Pablo Fernández: “Si IU decide quedar, marcharemos nós”

Pablo Fernández afirmó que si IU decide siguir nel Gobiernu nel casu d’aprobase les midíes d’axuste económicu, esto supondrá la salidá del Bloque y la rotura de la coalición.

El voceru del Bloque por Asturies compareció güei en rueda de prensa xuntu al diputáu y secretariu xeneral de la formación Roberto Colunga, onde desplicaron los puntos algamaos el pasáu sábadu en La Pola Siero, depués de que la formación celebrara’l so Congresu Nacional.

Pal Bloque les midíes anuciaes pol presidente del Gobiernu español, José Luis Rodríguez Zapatero, pa reducir el déficit son “inaceptables”. Poro, los nacionalistes van pidir a los sos socios de coalición dexar el Principáu. “Nun podemos tar nun Gobiernu que sofita midíes económiques de dereches, supondría’l suicidiu políticu”, dixo Fernández.

El voceru de la formación afirmó que taben en sintonía con IU en refugar eses midíes, pero en casu de dase la hipótesis de que nun abandonaran el Principáu, el Bloque si dexaría l’Executivu, el grupu parllamentariu d’IU-BA-Verdes y los conceyos, “sedría una reacción en cadena”. Sicasí, apuntó que “pel momentu” nun se situen nesi escenariu.

Lo que nun supón un problema pa siguir formando parte del Executivu ye’l tema de la incineradora, yá que la formación entiende que nesta llexislatura nun se va facer, “forma parte del material eleutoral de les próximes eleiciones, el so costu nun se pue asumir agora, polo que queda anulada”.

Aliances y Valledor

Pablo Fernández apuntó tamién que la formación va abrir una serie de conversaciones “que puen llevar a una negociación”, con fuerces d’esquierdes, asturianistes, ecoloxistes y feministes. “Hai que configurar un espaciu políticu alternativu al PSOE y el PP”, solliñó.

Entrugáu polos periodistes sobre si taben más cerca d’IU o de Francisco Javier García Valledor, ex diputáu d’IU-BA-Verdes qu’abandonó el so escañu por discrepancies cola direición, Fernández dixo que nun había nenguna diferencia, “Valledor ye miembru d’IU, nun facemos esa dixebra”.

Del mesmu mou, afirmó que taben d’alcuerdu cola posición del ex diputáu sobre la xuntura de la esquierda asturiana. “Nós tamién apostamos por esi nuevu espaciu políticu, pero ye dalgo polo que tamién apuesta la direición d’IU”.