El PSOE va proponer una llei d’usu pal lleonés

El PSOE va presentar el próximu miércoles nes Cortes de Castiella y Lleón una Proposición Non de Llei pa cumplir col Estatutu y regular l’asturlleonés nes zones onde tovía se fala.

“Vamos pidir una cosa tan cenciella como que se cumpla lo que yá apaez nel Estatutu, lo que nel so día foi aprobáu pero qu'agora falta por desenvolver y aplicar”, dixo José Ignacio Martín Benito, procurador por Zamora nes Cortes de Valladolid y encargáu de temes rellacionaos cola cultura y el patrimoniu nel PSOE de la comunidá.

Él va ser l’encargáu de presentar el próximu miércoles una Proposición Non de Llei pa facer efeutivu l'artículu 5.2 del reformáu Estatutu d'Autonomía, qu’esplicita que'l lleonés va ser oxetu de protección específica per parte de les instituciones pol so particular valor dientro del patrimoniu llingüísticu de la comunidá. Amás d'añadir que la so protección, usu y promoción van ser oxetu de regulación.

La Proposición Non de Llei tien l'envís de cumplir col mandáu d'esi artículu y regular les midíes pa conservar l'idioma propiu, “entamando poles zones nes que realmente se caltien el lleonés, nós nun vamos pidir que se dean clases nes contornes onde nun se fala”, afirmó José Ignacio Martín Benito a ‘Diario de León’.

El diputáu autonómicu afirmó a esi periódicu que’l so partíu yá tien preparaes una serie de midíes d’actuación, pero que nestos momentos lo que procede ye reclamar consensu pa poder facer realidá lo que diz l'artículu 5.2, “una llei d'usu”.
 
El PSOE cuenta con que la so propuesta algame’l consensu dientro del Parllamentu autonómicu.