El Bloque por Asturies considera que l’alcuerdu de gobiernu ta rotu

El Bloque considera que l'alcuerdu de gobiernu ta rotu pola decisión “unillateral” de la FSA de contruyir la incineradora. Polo que van plantegar a IU y Los Verdes la rotura del pautu.

La organización nacionalista, que celebró güei en Siero'l so Congresu Nacional, va plantegar a los sos socios la rotura inmediata del alcuerdu de gobiernu cola FSA, “si les midíes propuestes pol Estáu materialícense na acción de Gobiernu d’Asturies”.
 
El Bloque nun quier que les midíes del Gobiernu español pa reducir el déficit “torguen el desenvolvimientu de les polítiques sociales, dende la esquierda, contemplaes nel alcuerdu de gobiernu robláu pola FSA-IX-BA-LV”.

Del mesmu mou, alcordaron abrir de forma inmediata'l diálogu con toles fuerces polítiques y sociales dispuestes a constituyir una plataforma “lo más amplia posible”, de cara a les eleiciones del 2011.

La formación diz queren constituyir una alternativa d'esquierdes, asturianista y ecoloxista énte los “proyeutos escosaos" de la FSA y el PP. “El ciclu políticu que se cierra nel 2011 precisa una respuesta xenerosa y xunitaria que dexe un futuru dignu pal nuesu país, Asturies”.

El Bloque diz reafirmar la so total oposición a la construcción d'una planta incineradora, pa lo que va poner en marcha midíes sociales, polítiques y xurídiques pa torgar la so construcción. Consideren que la decisión “unillateral” de la FSA constitúi un fechu d'enorme gravedá que motiva la rotura del alcuerdu de gobiernu.
 
“La crisis convierte'l proyeutu de construcción de la incineradora n'invidable a curtiu plazu, pos resulta dafechu irresponsable empeñar a los conceyos y a la sociedá asturiana en más de 400 millones cuando se tán plantegando midíes d'axuste brutales a trabayadores, pensionistes y paraos”, afirma la organización.

El Bloque diz qu’esiste un marcu de trabayu dende'l Gobiernu y el Parllamentu cola ellaboración y aprobación d’una llei de Xestión de Borrafes y dende los conceyos col planteamientu de midíes alternatives a la incineración. Poro, faen un llamáu a la sociedá pa movilizase contra la incineradora, “que va en contra de la salú pública, del mediu ambiente y de los intereses económicos de la sociedá asturiana”.

La mesma respuesta que soliciten a los partíos políticos, sindicatos y sociedá contra les midíes d'axuste económicu propuestes pol gobiernu d'España, “una agresión a los derechos de trabayadores, pensionistes y paraos, y que pretenden facer pagar la crisis al que más la sufre”.
 
Alderique "racional"

La crisis nel Gobiernu asturianu tres la decisión de construir la planta incineradora de Serín, les midíes económiques anunciaes pol Gobiernu español y el so efeutu n’Asturies, amás de les posibles aliances polítiques de cara a les elecciones de 2011, foron los tres temes claves que trataron nesti Congresu Nacional del Bloque por Asturies, que se celebró dende les 11 de la mañana hasta cerca de les ocho de la tarde nel Hotel Lóriga de La Pola Siero.

Esti Congresu vino depués de dos meses de debate internu y aconceyamientos con delles organizaciones. Sicasí, a les 17.30 de la tarde, hora anunciada pa dar a conocer los alcuerdos algamaos, Pablo Fernández informó a los medios de que tovía nun había consensu en nengún de los puntos. A la fin, la organización informó del resultá del Congresu al traviés d'una nota de prensa recibida depués de les ocho de la tarde.

“Ta participando la xente con diferentes posiciones, ta aportando bayura a la organización, pero’l Bloque tien que treslladar una posición unitaria, nun queremos salir perxudicaos”, afirmó’l voceru de la organización, que tamién dixo que l'alderique taba produciéndose dientro de la “racionalidá”.

Pablo Fernández dixo que nengún de los tres puntos a tratar taba siendo más conflictivu qu’otru. “Tán rellacionaos toos, la incineradora coles polítiques económiques, porque va costar unos 500 millones na época na que tamos. Mientres que siguir o salir del Gobiernu tien que ver cola política d’aliances”, apuntó.

Na Conferencia Nacional, órganu de debate y toma de decisiones de calter extraordinariu ente conceyos nacionales, participen con voz y votu les 20 persones que formen parte de la Xunta Nacional, órganu de representación de los conceyos, y les 10 persones que formen parte de la Direición Nacional.

Política d’aliances

Pablo Fernández confirmó a Asturies.com la esistencia de dellos contactos con otres organizaciones del espectru asturianista. “Hubo dellos contautos, pero nun se sacó nenguna conclusión, foron intercambios de pareceres, nada trescendental”, afirmó’l voceru del Bloque por Asturies.