La emigración celebra la fiesta de la llingua del país

El Conseyu de Comunidaes Asturianes celebra esti fin de selmana’l Día de les Lletres Asturianes nel Esterior, güei nel Centru Asturianu de Castellón y mañana nel de Barcelona.

Nes dos ciudaes, los actos entamarán a les 12 hores coles intervenciones institucionales del Presidente del Conseyu de Comunidaes Asturianes, Manuel Fernández de la Cera, la Direutora Xeneral de Política Llingüística, Consuelo Vega y del representante de l’Academia de la Llingua Asturiana, Pablo Manzano. Darréu vendrá una conferencia de Roberto González-Quevedo titulada ‘La casa tradicional asturiana’, un recital de Berta Piñán y l’actuación de La Bandina’l Tombo.

En Castellón, onde va asistir la cantante uvieína Cristina del Valle, los actos van ser nel Hotel NH Mindorovan. Na xornada van celebrar tamién una xinta y una espicha, amás de xuegos tradicionales. Mientres, mañana’l Centru Asturianu de Barcelona celebra tamién el Día del Bollu, col repartu de bollos preñaos y vinu, competición de fútbol y xuegos tradicionales.

El Día de les Lletres nel Esterior vien celebrándose alternando añalmente centros asturianos d'España, restu d'Europa y América, como sedes oficiales. N'España, foi la primer celebración en 2001 en Les Palmes, siendo tamién sedes les ciudaes de Logroño, nel 2004, y Madrid, nel 2007. N'América, s'elixeron Montevidéu nel 2002, Bonos Aires, nel 2005, y Chile nel 2008.
 
En cuanto a los centros d'Europa, foron sede del Día de les Lletres, París nel 2003, Liexa nel 2006 y les ciudaes suizes de Lausanne y Berna l’añu pasáu. El Conseyu organiza esta actividá en colaboración con la Direición Xeneral de Política Lingüística y la Academia de la Llingua.