Convoquen la segunda manifestación contra les midíes anticrisis

El próximu día 2, va celebrase una nueva manifestación n’Uviéu pa defender los servicios públicos, l'emplegu dignu y refugar que la crisis “seya pagada por quien nun tien la culpa”.

Les organizaciones sindicales representatives nos diversos ámbitos de l'alministración, convocantes de la manifestación del 19 de mayu, afirmen valorar “descomanadamente” la participación na manifestación celebrada n'Uviéu, “na que 4000 persones espresaben el so total refugu a les midíes anunciaes pol presidente del Gobiernu”.

Los sindicatos del sector públicu refuguen “de la manera más tayante” les midíes aprobaes nel Conseyu de Ministros del xueves 20, “que pretenden facer pagar la crisis a persones dependientes y xubilaos, families y personal emplegáu públicu”.

Al empar, refuguen tamién les midíes d'axuste que se tán adoptando n'Asturies, “y que suponen yá un retayu del emplegu y un amenorgamientu sustancial na atención al conxuntu de la población”.

Del mesmu mou, convoquen otra movilización pal próximu miércoles día 2 de xunu, que saldrá de la Estación del Norte d’Uviéu a les 6 de la tarde y finalizará na Plaza Porlier.

Les organizaciones convocantes faen un llamamientu a les persones en paru y al personal interín pa sumase a les movilizaciones. “Va ser el sector más castigáu: miles de persones en paru y con emplegos precarios esperen n'Asturies aportar a la función pública. Col previsible retrasu na edá de xubilación y les restricciones a la contratación, van ser los sectores más vulnerables”, apunten pa finar.