Los seguros cubrieron 325 ataques d'animales salvaxes a ganaderíes

Los ataques d'animales salvaxes, sobre too llobu, a ganaderíes asturianes, costaron en 2009 a les aseguradores 108.165 euros, xeneraos polos daños en 325 accidentes.

Asina lo informó'l presidente de l'Agrupación Española d'Entidaes Aseguradores de Seguros Combinaos (Agroseguro), Antonio Fernández Toraño. El responsable de la entidá robló ayeri un conveniu col conseyeru de Mediu Rural, Antonio Martín, pol que'l Gobiernu autonómicu va sovencionar con 1,8 millones d'euros la contratación d'esti tipu de cobertories pa llabradores y ganaderos mientres esti añu. Dempués ofrecieron una rueda prensa.

Según los datos ofrecíos por Toraño, foron un total de 325 los ataques peritados nel 2009, principalmente causaos pol llobu. D'ellos 236 fueron a ganáu vacuno, 79 a ovín y diez a caballar. La cuantía de los daños cubiertos foi de 108.165 euros.
  
La contratación del seguru per parte de los ganaderos inclúi esti tipu de serviciu. En total son 3.013 los ganaderos de vacunu soscritos, 218 los d'ovín y 116 los de caballar.
  
N'Asturies, en total ente ganaderos y llabradores, son 21.568 los soscriptores que contrataron Agroseguro nel 2009, cubriendo un capital total de 211.512.143 euros. Pa tolos interesaos nesti tipu de servicios nel 2010, la Conseyería de Mediu Rural acuta sovenciones por un total de 1,8 millones d'euros esti añu, 100.000 euros más que nel exerciciu anterior. En total son 20 llinies a cubrir ente les que figuren llechuga, quivi, ganáu vacunu, ganáu caprín, ganáu cebu, retirada y destrucción d'especies o uva de vinificación.
  
La mayor parte de les sovenciones van dir destinaes a inversiones en seguros en materia de ganáu vacunu (unos 800.000 euros) y retirada y destrucción d'animales muertos (unos 700.000 euros). Nel apartáu agrícola, la mayor parte de problemátiques cubiertes son les causaes pol vientu y el granizu.  
  
Esti tipu de seguros cubren dende daños por ataques o enfermedaes a reses, a afecciones de temporales o accidentes en colleches y plantaciones. Los aseguraos tienen qu'encarar aproximadamente un  47% de la póliza, correspondiendo l'importe restante a l'Alministración. Nesti sen, la sovención del Principáu algama hasta un 25% d'esta parte, corriendo'l restu por cargu de l'Alministración del Estáu.
  
Nel casu del ganáu vacunu, el preciu de la póliza, dependiendo del nivel de garantíes contratáu, pue tar ente un 1,5% y un 5% del valor del animal.
  
Aurelio Martín destacó la importancia d'esti tipu de cobertories pa "la pervivencia del sector ganaderu y agrícola", y señaló "l'esfuerzu importante" de la so Conseyería. Pela so parte, Toraño espresó'l so "apoyu a tola política de cobertoria de riesgos pa ganaderos y llabradores n'Asturies". Tamién calcó nel papel qu'Agroseguro xuega nel sector, pues "en munchos países de la Unión Europea nun esisten esti tipu d'organizaciones".

Ensin pólices pa la faba
  
Na so esposición, Toraño esplicó que, dientro del apartáu de cultivos, el más aseguráu ye'l maíz de forraxe. Per otra parte, nel 2009 nun se robló nin una sola póliza pa cultivu de faba. Según esplicó Toraño, esiste demanda pero hasta'l momentu la ufierta de les compañíes nun s'adauta a lo que los collecheros demandaben.
  
Sicasí, pal presente exerciciu modificáronse delles condiciones económiques y adautóse'l periodu de cobertoria al ciclu de producción d'esta llegume, motivu pol qu'Agroseguro confía en que la próxima campaña sí haya cultivos soscritos.