PSOE ya IU refuguen reconocer el carácter d'autoridá pa los maestros

El Plenu de la Xunta refugó encamentar al Gobiernu que reconoza espresamente'l carácter d'autoridá pa los maestros nel exerciciu de les sos funciones nos centros educativos.

Asina lo pidía'l PP al traviés d'una proposición non de llei. El diputáu del PSOE, Alfonso Rey, manifestó que "al PP llénase-y la boca falando d'autoridá, orde y disciplina con ciertu fedor al pasáu" y llamentó que "pretenda trayer al Parlamentu les directrices de Génova".
  
"L'exemplu de Madrid ye'l qu'ustedes quieren treslladar al restu de comunidaes", dixo Alfonso Rey, que consideró "inoportunu y de gran cinismu políticu" la propuesta plantegada pol Grupu del PP na Xunta, pusto que'l so grupu perdió una gran oportunidá de sumase a la reforma educativa plantegada. "El so oxetivu güei ye xustificar el non del PP al pactu educativu y non otru", calcó'l diputáu socialista.
  
Pal PSOE "non cabe nenguna duda de que'l profesoráu ye la pieza clave del sistema educativu" y poro ta reconocíu y recoyíu en tolos documentos del Gobiernu del pactu educativu, unos documentos "a los que'l PP dixo que non".
  
El diputáu d'IU-BA-Verdes, Roberto Colunga, calcó en qu'el so grupu considera que'l profesoráu desarrolla'l so trabayu nuna sociedá que "cambió enforma" y destacó qu'espera que la proposición non de llei que presenta'l PP "quede equí y nun pase como na Comunidá de Madrid".
  
Dixo amás que'l so grupu defende la escuela pública y poro son "los primeros interesaos en que nos centros asturianos haya un buen ambiente de trabayu". "Si esto ye tolo que'l grupu popular propón nel ámbitu educativu, vamos apañaos", dixo.
  
El diputáu del PP, Emilio Pérez Cueva, foi l'encargáu de defender la proposición y destacó que tendría que ser "condición indispensable tener un profesoráu con autoridá y reconocíu socialmente n'ares de llograr la calidá educativa por toos deseada". Nesti sen, relató'l papel de profesores como motor de l'actividá de los centros docentes.
  
Indicó que cola so midida'l PP pretende cumplir con dalgo que demanda la sociedá polo xeneral y los profesores en particular y añadió que "obviamente va ser un llabor nel que tola sociedá tien que collaborar, hasta los mesmos profesores a los que se-yos va esixir mayor responsabilidá".
  
Xustificó amás la propuesta asegurando que n'España y en particular n'Asturies prodúxose un importante descensu na valoración social de la educación y del oficiu docente y consideró que la proposición respuende a "una clara y manifiesta demanda social".
  
"En concreto, los casos de violencia escolar que sufren maestros y profesores nos centros requieren, al nuesu xuiciu de midíes llegales, como ye la reconocencia espresa de la so condición d'autoridá, que consideren sin vacilación les agresiones qu'aquellos sufren como atentaos previstos nel Códigu Penal", dixo Pérez Cueva.