El Principáu diz que nenguna infraestructura va parase

Tres anunciar Fomentu l’axuste de la inversión, Areces diz que n’Asturies les infraestructures yá tienen contratu. Mientres que Buendía diz que nun se van parar, “van promovese”.

El presidente del Principáu d'Asturies, el socialista Vicente Álvarez Areces, dixo qu'Asturies tien la ventaya de que les sos obres relatives a grandes infraestructures, les grandes autovíes, el Puertu colos tráficos marítimos nuevos que s'incorporen cola Alta Velocidá, son "obres contractuales", esto ye, tán marcaes por relación ente'l Gobiernu y les empreses. "Ye probable que dalguna d'elles puea tener alguna ralentización, dalgo qu'evidentemente nun ye pa celebrar", almitió'l presidente.
  
Nuna entrevista na Cadena Ser, Areces contestaba asina a preguntes polos recortes n'inversión n'infraestructures anunciaos por Fomentu. Al so xuiciu, resulta "indudable" que si España tien que recortar 6.000 millones n'inversiones ente esti añu y el que vien, resulta "lóxico" qu'esi recorte afeute a tol territoriu. "Pero tamién hai que tener serenidá bastante pa pensar en que tenemos que ser solidarios non yá ente territorios, sinón tamién colo que tolos países europeos tán faciendo", añadió.
  
Sobremanera, sorrayó qu'esiste la seguridá de que les infraestructures asturianes van acabase. "Y amás, si'l Ministru da prioridá a l'Alta Velocidá, que ta llegando a La Pola Ḷḷena , y diz que nun va tener retrasos, ye importante nesti contestu de recortes", señaló. Asina, consideró "razonable" pensar que nengún de los grandes oxetivos del país va vese estropiáu.
 
Buendia diz que "van promovese"
 
El conseyeru d'Infraestructures, Francisco González Buendía, señaló ayeri en Xixón que de les palabres del ministru de Fomentu, José Blanco, sobre'l nuevu axuste de les inversiones n'obra pública, quedaba corto colo positivo, que ye que la Variante de Payares non sólo nun se va parar sinón qu'amás va impulsase la llegada de l'Alta Velocidá a Asturies.
  
Según él, too apunta a que la obra ta "garantizada dafechu no referente a axilidá y traminación" y confía en que'l restu de grandes infraestructures nun sufran incidencies.
  
Al respeuto d'estes últimes, Buendía, qu'asistió a la inauguración de la III Conferencia Central de Día Marítimu Européu 2010 na Llaboral, señaló que'l Principáu va tar "pendiente" a lo que puea pasar y aseguró que van velar polos grandes proyeutu d'infraestructures en marcha y que suponen el fin del aislamientu d'Asturies, como son l'Autovía del Cantábricu y la d'Uviéu-Salas-La Espina, sin dexar de llau a l'AVE.
  
Coles mesmes, calcó en que'l panorama presentáu por Blanco ye conocíu por toos y calcó en que nun se refirió a nenguna obra en concreto. Tamién apuntó que más que retayos, lo que paez ye que va haber son aplazamientos.
  
El conseyeru calcó en que'l Principáu va tratar l'asuntu con Fomentu y intentar qu'estes grandes obres nun sufran "dalguna incidencia notable". Nesti sen, esplicó que la conferencia sectorial del tresporte programada pal pasáu martes desconvocóla'l Ministeriu, algo qu'atribuyó a la necesidá d'analizar obra a obra pa determinar les prioridaes antes de volver convocala.