El PP diz a IU que si nun ta a gustu "marche pa casa"

"IU nun pue ser Gobiernu en Suárez de la Riva y oposición na prensa. El que nun tea contentu nel Gobiernu que marche pa casa", dixo la diputada del PP Inmaculada González.

El PP d'Asturies va pidir esplicaciones na Xunta Xeneral al Gobiernu polos retrasos nel pagu del Salariu Social Básicu dempués del "espectáculu llamentable" qu'al so xuiciu protagonizaron la conseyera de Bienestar Social, Noemí Martín (IU) y la vocera del Gobiernu, Ana Rosa Migoya (PSOE), "con declaraciones contradictories pa esplicar dichos retrasos".
  
En rueda prensa la diputada del PP, Inmaculada González, indicó que "nun puen andar a la griesca y debatiendo polos motivos de los retrasos nos pagos". Alertó amás de la previsión de crecimientu del númberu de peticiones de cobru y recordó qu'anque la llei tien un techu presupuestariu tamién recueye que toa aquella persona que cumpla los requisitos y lo solicite tien derechu a cobralu.
  
"Que cumplan la llei y que se dexen de discutinios", dixo la diputada del PP, qu'indicó que nun se trata d'aldericar el númberu de funcionarios qu'hai pa "tramitar los espedientes".
  
La diputada del PP anunció que'l so grupu va solicitar la comparecencia nel plenu de la Xunta de la conseyera y na comisión del viceconseyeru, pa que "dean tou tipu d'esplicaciones". Amás indicó que'l so grupu va estudiar les declaraciones de Laura González -ex conseyera de Bienestar Social- qu'aseguró que "cuando la so fía llegó al Gobiernu había espedientes nos caxones".
  
Pela so parte, el presidente del PP, Ovidio Sánchez, manifestó que se tán detectando retrasos de nueve meses nel pagu del Salariu Social y afirmó que pa los beneficiarios "esi retrasu pue suponer condenalos a pidir y pasar fame".
  
Criticó que l'Executivu de Vicente Álvarez Areces "colos recortes dea un golpe al estáu de bienestar" y volvió solicitar "mayor control de los chiringos que nada dan y tanto dineru suponen pa los asturianos".