Areces: “La política llingüística d’Asturies ye razonable”

El presidente del Principáu afirmó que la politica llingüística del so Executivu ye razonable, “anque dellos grupos prentendan politizar, yo creo qu’esto ye lo que quier la mayoría”.

Vicente Álvarez Areces foi entrevistáu esta mañana nel programa ‘Protagonistas’ de Punto Radio, dende la sede del diariu ‘El Comercio’. Asina, refirióse a la situación llingüística d’Asturies tres la entruga unviada por un oyente sobre’l gastu del Principáu nos viaxes institucionales y na normalización del asturianu.

“Respeuto al asturianu y el dineru que se va al bable, yo creo qu'equí caltenemos una política llingüística bien razonable. El bable ta reconocíu nel nuesu Estatutu, ye una llingua que protexemos, que s'acepta nel sistema educativu por vía voluntaria, que protexemos la so toponimia, asoleyamos les sos publicaciones d'una manera tan razonable qu'anque dellos grupos pretendan politizar más, yo creo qu'esto ye lo que quier la mayoría d'Asturies", afirmó’l Presidente.

Sama-Velilla

Areces tamién se refirió a la llinia d’alta tensión Sama-Velilla, tres entrugar un oyente si suponía l’esbarrumbe del PSOE. El xefe de Executivu afirmó que la linia ye l’amuesa de que'l PSOE ye coherente colos sos plantegamos n'Europa y qu'actúa con una concepción d'Estáu.

“Les interconexiones eléctriques nun son temes locales, nin siquiera rexonales, son temes qu'afeuten a un país, hai que ser coherentes y facelo per onde menos impacte”, dixo Areces, qu’afirmó tamién que’l trazáu ente Asturies y Lleón tien que permitir la evacuación de la enerxía, “sinón quedaría estranguláu'l país".

Cascos “estremista”

Entrugáu pola posible candidatura d’Álvarez-Cascos a la presidencia del Principáu, Areces afirmó que pa los informadores y los medios de comunicación ye una persona que “da xuegu”.

El xefe del Executivu afirmó que ye una persona que ta nel ámbitu de la conflictividá permanente “ya inclusive tuvimos alcuentros nos tribunales”. Areces dixo que Cascos, “dacuando”, tien posiciones estremes, señalándolu como culpable de la crisis del PP n'Asturies ente 1995 y 1999, “que dexó a esta comunidá nuna crisis institucional ensin precedentes”.

“Les encuestes nunca-y foron demasiáu bien na valoración de los ciudadanos y, particularmente, nel so propiu partíu produz tamién una polarización que yo creo que nun va añedir nada nuevu", solliñó pa finar.