UNA propón recuperar el 25 de mayu

UNA propón la incorporación del 25 de mayu al calendariu festivu y la recuperación de la Sala Capitular como llugar simbólicu de la identidá y memoria del país.

La Xunta Executiva d'Unidá Nacionalista Asturiana (UNA) fixo pública una declaración na que solicita al Gobiernu asturianu que s'entame un procesu pa recuperar la fecha del 25 de mayu como ún de los finxos más importantes de la hestoria asturiana.

El coordinador d'UNA, Miguel Ánxel Díez, recordó qu'Asturies entra na dómina contemporanea cola proclamación en 1808 de la soberanía de la Xunta Xeneral, "la rebelión del pueblu asturianu en defensa de la llibertá, l'unvíu d'embaxadores a Inglaterra, la creación del Exércitu Asturianu y el diseñu de la nuestra bandera".

Pa Díez, esta data pasa tolos años ensin nengún tipu de reconocencia institucional y yá ye'l momentu de camudar esta dinámica incluyendo'l 25 de mayu nel calendariu festivu asturianu. UNA propón tamién que se recupere, reconoza y esparda la redolada de la Sala Capitular, onde tuvo llugar la xunta de la Xunta Xeneral y la proclamación de soberanía, “como un llugar emblemáticu y simbólicu pa la identidá asturiana y pa la llucha pola llibertá”.

El coordinador d'UNA fixo alcordanza tamién de que ye en 1808 cuando Xovellanos, por mandáu de la Xunta Xeneral, diseña "la bandera asturiana azul y oru qu'entá utilizamos los asturianos anguaño".

Unidá Nacionalista Asturiana va celebrar el próximu martes 25, a les 20.30 hores na Corrada del Obispu, a la puerta de la Sala Capitular, un homenaxe a los revolucionarios de 1808 que va cuntar con delles intervenciones rellacionaes colos acontecimientos.