Día del Llibru Asturianu

La ONX alerta de la falta de reconciliación en Kosovu

|

L'ausencia d'un procesu significativu de reconciliación ente les comunidaes en Kosovu, xunto coles dificultaes económiques, fai que persista'l riesgu de que se produzan disturbios.

Asina lo afirmó Lamberto Zannier, representante especial del secretariu xeneral de la Organización de Naciones Xuníes, Ban Ki Moon pa Kosovu, que declaró la so independencia de Serbia nel 2008
  
Según Zannier, la Misión d'Alministración Provisional de Naciones Xuníes en Kosovu (Minuk), sigue emprestando una estrecha atención a les cuestiones qu'afecten les relaciones ente la mayoría, albanesa, y otres comunidaes.
  
La Minuk tuvo alministrando Kosovu dende 1999 -cuando la OTAN espulsó a les tropes yugoslaves mientres la guerra de Kosovu ente serbios y albanokosovares-, pero abandonó esta función nel 2008, cuando los albanokosovares declararon la independencia del territoriu. Serbia refugólo y sigue esperando que la MINUK desarrolle un papel importante.
  
"Les relaciones ente la Minuk y les autoridaes de Kosovu son corteses, y el personal de la Minuk sigue calteniendo una serie de contactos diarios y fructíferos a nivel de trabayu colos sos homólogos kosovares", indicó Zannier anueche al Conseyu de Seguridá de la ONX.
  
Con ayuda de la MINUK, toles partes siguen teniendo contautos direutos sobre les persones desapaecíes -según la Cruz Roxa, tovía hai 1.862 desapaecíos en too Kosovu- pero "por desgracia, la cooperación práctica y directa ente Belgrado y Prístina nun aumentó" a otres zones xenerales, añadió.
  
La misión sigue "ofreciendo los sos buenos oficios pa la resolución de les cuestiones práctiques ente Prístina y Belgráu, esperando que puean empezase más víes de diálogu directes pa la resolución d'estes cuestiones".
  
Zannier sorrayó que la situación en Kosovu permaneció estable, anque esisten les posibilidaes de que se produza la inestabilidá, especialmente na zona norte de Kosovu. "L'ausencia d'un procesu significativu de reconciliación ente les comunidaes sigue siendo un desafíu y esto, xunto coles dificultaes económiques, siguen presentando un riesgu de disturbios sociales", detalló.
  
Mientres la so intervención énte'l Conseyu, sorrayó la posición única de la MINUK pa facilitar el diálogu ente les comunidaes y pidió apoyu internacional pa la operación.

Contador Estadistiques