Teberga y Ribeseya sumen 42 conceyos cola toponimia iguada

El Conseyu de Gobiernu del Principáu d’Asturies, autorizó ayeri los proyeutos de Decretu polos que se determinen los topónimos oficiales de los conceyos de Ribeseya y de Teberga.

Asina, un total de 42 conceyos concluyeron yá la revisión de los sos topónimos tradicionales, mientres qu’otros 19 entamaron esti procesu. N'Asturies los trabayos de normalización toponímica empecipiaron nel añu 2004, cola puesta en marcha de la Xunta Asesora de Toponimia y l'apertura d'espedientes d'oficialización en dellos conceyos.

Dende la Conseyería de Cultura, indiquen que se trata d'un procesu de revisión llargu y minuciosu, empecipiáu previa petición de los mesmos conceyos, nel qu'intervienen los partíos políticos con representación municipal, los coleutivos de vecinos, les asociaciones de la zona, l'Academia de la Llingua Asturiana y la Universidá d'Uviéu, asina como investigadores, encuestadores y espertos en toponimia.  

Los próximos topónimos que tienen que pasar el preste del Conseyu de Gobiernu son; Avilés, Quirós, Taramundi y Muros, pendientes del trámite d'audiencia nos respeutivos conceyos. L´últimu conceyu que vio fináu’l so procesu foi Parres, cola espublización el pasáu mes de setiembre de 2009 del so Decretu nel BOPA, momentu nel que los topónimos entamen a ser oficiales.

Otros 17 conceyos tienen abiertu'l so espediente, tando en distintes fases de tramitación: Santu Adrianu, Ayande, Caravia, Castropol, Llanera, Tinéu, Valdés, Ponga, Illas, Villanueva d'Ozcos, Somiedu, Bual, Uviéu, Ibias, Salas, Samartín d'Ozcos y Santalla d'Ozcos.

Mientres que tovía nun entamaron el procesu; Cabrales, Candamu, Cuaña, Cuideiru, Eilao, Muros, Navia, Onís, Peñamellera Alta, Peñamellera Baxa, Pravia, Les Regueres, Santiso d'Abres, Sotu'l barcu y Villayón.