El PAS celebra los sos 25 años con un conciertu coral en Xixón

El PAS celebra 25 años d’esistencia, “convirtiéndose nel partíu asturianu con más años d'actividá”, con un conciertu y una campaña que quier facer llegar a tola sociedá’l so proyeutu.

Pa celebralo, van entamase actos por toa Asturies a lo llargo de los próximos doce meses, incluyendo conciertos, actos institucionales, homenaxes, actos políticos, etc. Los actos empiecen esta fin de selmana con dos actividaes. Pa entamar un conciertu coral de la Coral Polifónica d’Asturies Cruz de la Victoria, esti sábadu 22 de mayu a partir de les ocho y media de la tarde na Ilesia de San José, en Xixón, y al que el PAS convida a participar a tolos simpatizantes.

El segundu actu, que se va a celebrar el domingu 23 de mayu, va ser l'empiezu de los actos na cai que van llevar al PAS per toa Asturies, con una campaña na que quier facese partícipe a tolos asturianos del proyeutu del PAS, “que nun ye otru que sacar a Asturies del pozu na que la metieron los partíos gobernantes y l'oposición, despreocupaos polos asturianos”.

La primera de les actividaes na cai va celebrase nes cercaníes del Rastru de Xixón, ente les 10:30 hores y l'hora de zarru del mesmu. El presidente del Partíu Asturianista, Xuan Xosé Sanchéz Vicente, va tar presente na carpa que se va a instalar en Xixón, ente les 12:30 y les 13:30 hores, p'atender a los ciudadanos que quieran dar a conocer los sos reinvindicaciones y problemes.

Esti actu va ser el primeru de munchos otros que nos próximos meses va llevar a la PAS a otros munchos conceyos asturianos, “dientro d'una campaña de comunicación cola sociedá asturiana, na que quier arrexuntase a toles persones descontentes cola situación de Asturies, alredor del proyectu anováu del PAS”.