Los funcionarios van manifestase contra les midíes de Zapatero

Catorce sindicatos de la función pública asturiana convoquen una movilización pa refugar les midíes  “que pretenden facer pagar la crisis a los que nun son responsables”.

Satse, Simpa, Anpe,Osae, Staj, Csif, Usu, Usipa, Sipla, Sicepa, Acaip, Sipu y Suatea anunciaron güei rueda de prensa la manifestación que va tener llugar mañana miércoles 19 de mayu, con salida a les 6 de la tarde de la estación del Norte d’Uviéu.

“Los retayos de calter social, como l'ataque a les pensiones o lo referente a la llei de dependencia amuesen claramente cual va ser la llinia del gobiernu, ye'l primer actu de la puesta en marcha d'una política antisocial dictada polos organismos europeos esmolecíos en salvaguardar los intereses de los causantes d'esta crisis”, anuncien los convocantes.

Denuncien los retayos nel gastu educativu y la sanidá pública, asina como nel conxuntu de les alministraciones, “mientres siguen despilfarrándose recursos en fastos, subvenciones, altos cargos nomaos a deu y siguen ensin tomase midíes pa crear emplegu y acabar cola impunidá de los defraudadores de too tipu”.

Amás, camienten qu’una reforma llaboral y un aumentu na edá de xubilación, lloñe de contribuyir a acabar con a la crisis, va provocar más paru y más miseria pal conxuntu de trabayadores. Asina, manifiesten la so solidaridá col conxuntu de trabayadores, paraos y pensionistes y recuerden que nesti sector les socesives conxelaciones salariales supunxeron una pérdida de poder adquisitivu del 22, 6 % dende l'añu 1991.

“La eliminación d'ufierta d'emplegu públicu n'Asturies va facer que les llistes del paru sigan aumentando, amás tamíen peligren los puestos de trabayu desempeñaos pol personal interín”, apunten pa finar.