El Comité del PP va tener que reunise pa proponer la candidatura asturiana

El Comité Electoral del PP d'Asturies va tener que reunise pa proponer a la direición estatal del Partíu la candidatura pa les próximes eleiciones autonómiques.

"Los candidatos decídelos el Comité Electoral Nacional, a propuesta del Comité Electoral Rexonal", indicaron fontes de la direición nacional del PP consultaes por Europa Press. Amás, les mesmes fontes precisaron que "nesti momentu nun ta abiertu'l plazu de propuesta de candidatos".
  
N'Asturies, el Comité Electoral ta presidíu pol conceyal del Ayuntamientu d'Uviéu, Agustín Iglesias Caunedo, actuando de secretariu, Eduardo Junquera (conceyal del PP en Xixón), y como vocales Arancha Arechaga, Ángel Benjamín Vilaboa, Cristina García Montes, Salvador Garriga, Alejandro Arias, Begoña Gancedo y Álvaro Fernández Martínez.
  
Nel artículu 47.2 de los Estatutos del PP, señálase qu'una de les funciones del Comité Electoral Rexonal ye precisamente "ellaborar y proponer les candidatures al Organo lexislativu de la Comunidá Autónoma", nel casu d'Asturies, a la Xunta Xeneral del Principáu.
  
D'esta forma, sería'l Comité Electoral Rexonal el que tendría de proponer al Comité Electoral Nacional, nel so casu, una posible candidatura encabezada pol ex ministru de Fomentu, Francisco Álvarez-Cascos. El Comité Electoral Nacional ye'l que tien les competencies pa designar a los candidatos a les Presidencies de los Gobiernos de les comunidaes autónomes. Asina, el Comité Electoral del PP d'Asturies tien que reunise de primeres y facer la propuesta a Madrid, que ye onde a lo último se toma la decisión.
  
La selmana pasada'l PP d'Asturies fixo público qu'el so presidente, Ovidio Sánchez, treslladara al presidente del partíu, Mariano de Rajoy, "la propuesta" pa que Cascos encabezare la candidatura n'Asturies. Foi'l vienres, cuando'l secretariu xeneral del PP d'Asturies, Fernando Goñi, confirmó esa conversación de Sánchez con Rajoy. En tou casu, les fontes del PP asturianu consultaes señalaron que pel momentu nun esiste fecha prevista pa la xunta del Comité Electoral Rexonal, al pregunta-yos pol trámite pa treslladar una posible candidatura de Cascos a Madrid.
  
Mientres, la secretaria xeneral del PP, María Dolores de Cospedal, afirmó güei que la dirección nacional del so partíu va apoyar el meyor candidatu que proponga'l so partíu n'Asturies pa les elecciones de 2011, yá seya Francisco Álvarez-Cascos o otra persona. Pero amás dixo que'l PP d'Asturies nun fizo una presentación o una propuesta formal de candidatu.