Areces afirma que la regasificadora ye clave p’Asturies

El presidente del Principáu afrirmó que la regasificadora  ye un elementu clave pal desenvolvimientu enerxéticu d'Asturies y una pieza fundamental na Planificación Enerxética d'España.

Vicente Álvarez Areces pronuncióse asina mientres la inauguración de la ESPO Awards 2009, entamada con motivu de la reconocencia del Puertu d'El Musel como Meyor Puertu Européu en 2009 pola European Sía Ports Organization.

El xefe del Executivu señaló que la regasificadora proyeutada n’El Musel va facer qu’Asturies tenga una moderna planta de regasificación, “capaz de atrayer y desenvolver nueves ya importantes inversiones enerxétiques ya industriales”, ente les que destacó nuevos proyeutos de plantes de ciclos combinaos de gas, “que van dexar avanzar nel accesu del nuesu texíu industrial a fontes d'enerxía más llimpies”.

Amás, señaló la so importancia dientro del conxuntu del Estáu, al ser una de les siete terminales de regasificación que va tener España, “lo que la convierte en clave pa diversificar la ufierta enerxética del nuesu país y ameyorar les condiciones de seguridá del suministru enerxéticu”.

Ampliación d’El Musel

Areces dixo tamién que l’ampliación del puertu d’El Musel ye una de les actuaciones más importantes pal desenvolvimientu comercial, enerxéticu ya industrial d'Asturies.

“El Musel atópase ente los diez primeros puertos comerciales d'España, ye'l  primer puertu graneleru y la vía d'entrada de los carbones y minerales metálicos que demanden los procesos productivos d'actividaes básiques de la economía asturiana, como la siderurxa, la metalurxa y la producción d'enerxía eléctrica”, afirmó.