Pa la TPA nun ye patria querida

El vienres 7 de mayu, Día de les Lletres Asturianes, fomos munchos los que reivindicamos la oficialidá del asturianu pela cai Uría y que tamíen asistimos al actu que la nuestra Academia de la Llingua celebra cada primer vienres de mayu nel Campoamor.

Nel mesmu teatru taben les cámares de la TPA, que depués de madrugada diba emitir l’actu allanziáu. Nun ye l’enfotu d’estes llinies criticar que la televisión pública emitiera la Xunta Estraordinaria de l’ALLA a les 0.45 de la nueche, cuando tien la frecuencia de TPA2 emitiendo la mesma programación con una hora de retrasu (quiciabes, si tuviera emitiéndolo al empar laSexta igual pagaben millones polos derechos d’emisión).

Tampoco quiero falar de la probetaya programación especial (si pue llamase asina) cola que la RTPA celebró’l día grande del idioma. Programación que se llindaba a la tresmisión del actu académicu pa xente con insomniu y dedica-y un capítulu del xenial programa de la RPA ‘Nomes d’Asturies’ a la vida de Xosé Antonio Garcia, l’autor homenaxeáu na Selmana de les Lletres. Un capítulu que mesmamente apaecía, ensin que la Conseyería de Cultura y la Direición Xeneral de Política Llingüística quedaren colloraos, nel programa oficial de la Selmana de les Lletres.

Nun quiero dicir equí que la canal asturiana podía tener emitíu dalgún conciertu de música o curtiumetraxe n’asturianu, tener fecho’l doblaxe de dalguna película, documental ya, mesmamente, emitir un especial, valía tamién repetición, de dalgún de los pocos programes n’asturianu qu’emite, pa conmemorar simbólicamente’l día.

Podría falar d’eses coses pero casi nun voi nin mentales equí. L’enfotu d’estes pallabres ye entrugar que pasaría nun país normal, si nun actu oficial d’una institución de calter públicu, como ye l’Academia de la Llingua Asturiana, que ye emitíu per televisión y nel que se toca l’himnu del país, la canal pública decide finar la trasmisión xustu enantes del entamu de los primeros acordes de la solemne partitura.

Podríamos entruga-ylu a Julián Reyes, exdireutor de deportes de TVE, destituíu depués de que na tresmisión de la Copa del Rei de 2009, qu’enfrentó al Barcelona y al Athletic, decidiera nun emitir l’himnu del Estáu por mor de la xiblada de los espectados asitiaos en Mestalla.

L’asuntu llegó al Congresu, tres que’l PP pidiera la comparecencia del direutor de RTVE nesi tiempu, Luis Fernández, p’asina esclariar los motivos polos que nun se tresmitió en direuto. Tamién la vicepresidenta primera del Gobiernu español, María Teresa Fernández de la Vega, llegó a manifestar el so respetu pola decisión de TVE de cesar al xefe de Deportes.

Sicasí, n’Asturies la TPA emite l’actu principal del Día de les Lletres a les 0.45 de la nueche y per riba corta la emisión del himnu d’Asturies, reconocíu nel nuesu Estatutu como ún de los símbolos cimeros de la comunidá, y nun pasa nada. Naide gorgutia, ¡yá nun ye poco qu’emitan l’actu!.

Nengún diputáu, seya nacionalista español o asturianu,  pide la comparecencia del direutor del Ente Públicu de Comunicación, qu’amás taba nel actu del Campoamor, pa dar esplicaciones na Xunta Xeneral.

Ye lo que tien nun ser un país normal…