Darréu señala la necesidá de concienciar na igualdá LGTB

Darréu diz qu’anque nos puea paecer dende l’aprobación del matrimoniu gai, la igualdá nun la decide la llexislación, “hai que concenciar y lluchar por camudar la mentalidá de la xente”.

El 17 de mayu de 1990, l’Asamblea Xeneral de la OMS suprimió la homosexualidá de la llista de les enfermedaes mentales. Con motivu dello güei celébrase’l Día Internacional contra la Homofobia y la Transfobia, “xornada de cellebración, anque tamién d’intensa llucha y vindicación que sofitamos y nos sumamos a ella col enfotu de que la mocedá nun tengan que pasar polo mesmo que los sos antecesores”, señalen dende Darréu

Dende la organización de mocedá indepentista denuncien que’l coleutivu LGTB tien que tener los mesmos derechos no civil, políticu y alministrativu y denuncien l’actual condición de precariedá del coleutivu, señalando’l rechazu de families y empreses pola condición sexual.

Del mesmu mou, recuerden que les  autoridaes de la ilesia católica nun paren d’atacar y mentir sobre les otres opciones sexuales a la heterosexual, “basándose nos más rancios prexuicios, mientres munchos de los sos miembros son cómplices o actores direutos de casos de pederastia u acosu sexual”.

“Queremos una Asturies xusta ya igualitaria y eso nun podrá ser si nun son plenos los derechos de toles opciones sexuales”, apunten. Amás, señalen que nun solo son drechos civiles, “la tolerancia ta nes lleis y ta nes nueses cais, debemos crear una concencia de normalidá y tolerancia pa facer d’Asturies una nación de ciudadanos llibres nun país llibre y tolerante”.