Skama la Rede entama grabar ‘Ye too mentira’

Depués del trabayu nel local d'ensayu, güei pela tarde Skama la Rede entama a grabar ‘Ye too mentira’, el tercer discu de la formación del Cabu Peñes, que pue tar na cai a finales de xunu.

‘Sarxentu Retonda’, ‘SOS. Fame en Tapia’, ‘Na nuestra realidá’, ‘Nunca vais poder’, ‘Nieva sobre moyao’, ‘Sí lo diz mio güela’, ‘Albo-rada impopular’, ‘Yes mongol’, ‘Condenáu’, ‘Ye too mentira’, ‘La resaca yá vendrá’ y ‘Pa bien o pa mal’ son los títulos de les canciones nueves que'l grupu va grabar nos Estudios Tutu de Corvera con Sergio Rodríguez.

El discu va ser espublizáu por Discos L'Aguañaz, al igual que ‘La nuesa hestoria’ y ‘Echaos a la mar’, l’últimu discu de la banda de ska-punk, espublizáu en 2007

Les lletres van siguir cola ironía y l’optimismu del grupu del Cabu Peñes. Ente los temes de los que van falar nes sos lletres ta la crisis, los medios de comunicación, les fuerces de seguridá, el pieslle de la fábrica d'Albo en Candás o la llingua asturiana. Anque pa esti discu tamién va ver temátiques non rellacionaes cola reivindicación, con un cantar d'amor y otru sobre una nueche de folixa.
 
No que cinca a la música van notase dalgunos cambios al pasar el grupu a tener dos guitarres y eliminar los teclaos, amás de la personalidá nueva que pue dar al grupu los tres músicos nuevos que s'incorporaron nestos dos últimos años.