Un consorciu garantizará la xestión integrada de los Picos d'Europa

Los responsables de Mediu Ambiente d'Asturies, Cantabria y Castiella y Lleón algamaron un alcuerdu pa recibir del Estáu, la xestión del Parque Nacional Picos d'Europa n'ochobre de 2010.

La xunta tuvo llugar esta mañana en Cuadonga, cola asistencia de la Conseyera de Mediu Ambiente de Castiella y Lleón, María Jesús Ruiz Ruiz; el Conseyeru de Desenvolvimientu Rural, Ganadería, Pesca y Biodiversidá, Jesús Miguel Oria Díaz; y el Conseyeru de Mediu Ambiente Ordenación del Territoriu ya Infraestructures del Principáu d'Asturies, Francisco González Buendía.

L'alcuerdu inclúi una propuesta común de Decretu que regule los órganos de xestión y participación, ente los que se va atopar una Comisión de Xestión del Parque y un consorciu interautonómicu, nel que van inxerise tolos medios que reciban del Estáu mientres el trespasu y que quier garantizar la unidá ambiental y la xestión integrada.

No que se refier a la Comisión de Xestión del Parque, les comunidaes autónomes van convidar a participar, con voz pero ensin votu, a una representación de l'Alministración Xeneral del Estáu y de los Conceyos con territoriu nel Parque.

Nel alcuentru d'esta mañana tamién s'afitaron una serie de criterios pa la negociación del trespasu col Estáu. Ente ellos destaca que l'añu de referencia pal trespasu va ser el 2009, por entender que ye'l que más favorez al conxuntu del Parque Nacional, a la so xestión integrada, y a los oxetivos de caltenimientu y desenvolvimientu sostenible que-y son propios. Al respeutive de la fecha pa rematar la tresferencia, los representantes de les comunidaes autónomes alcordaron intentar facer efeutivu'l trespasu enantes d'ochobre de 2010.

Coles mesmes, va treslladase al Ministeriu l'interés de les comunidaes, como nuevos xestores del Parque Nacional, por roblar un alcuerdu de cooperación y collaboración col Estáu p'asegurar la meyor collaboración del Parque Nacional de los Picos d'Europa a la consecución de los oxetivos de la Rede Española de Parques Nacionales.