Ñaz Entemecer, un coleutivu d’esquierdes y anticapitalista

Ta acabantes de ñacer Entemecer, “que quier articular un espaciu d'acción, llucha y pensamientu críticu que refugue les bases económiques, polítiques y sociales del capitalismu”.

Entemecer ye una iniciativa que se define como anticapitalista, internacionalista y d'esquierda, ecoloxista, que llucha contra'l racismu y la xenofobia, contra'l procesu de sustitución llingüística y la discriminación de los falantes d'asturianu y de gallego-asturianu, pola igualdá de derechos pa les persones LGTB, contra'l patriarcáu y pola lliberación de les muyeres.

Anuncien qu’Entemecer quier ser una ferramienta que, con estos principios, trabaye pola articulación n'Asturies d'un frente anticapitalista y unitariu que colos movimientos sociales y con dellos sectores de la esquierda caminar haza la tresformación radical d'esta sociedá.

“Paeznos qu'agora más que nunca ye necesario presentar alternatives al modelu capitalista que coles sos polítiques neolliberales namás que xenera inxusticies y desigualdaes en tolos ámbitos, y Asturies nun ye nenguna excepción”, señala’l coleutivu.

Una de les sos primeres actividaes foi l'asistencia y participación nos alcuentros ‘Enllazando Alternatives’, cumal alternativu qu'entamaron los xefes d'Estáu de la Unión Europea, América Llatina y Caribe, esti fin de selmana en Madrid.

Tamién, el vienres 21 de mayu, n'Uviéu, organiza un actu onde va participar un diputáu del Bloco de Esquerda de Portugal, un partíu que forma parte de la Esquierda Anticapitalista Europea y que nes últimes elecciones portugueses convirtióse na cuarta fuerza política del país.