Xega pide compromisu políticu contra la homofobia

Nel Día Mundial contra la Homofobia, Xega pide a les instituciones un compromisu firme contra la violencia y les discriminaciones por orientación sexual ya identidá de xéneru.

El coleutivu gai asturianu recuerda la necesidá de movilizase polos derechos de lesbianes, gais, transexuales y bisexuales cada 17 de mayu. “En 80 países los actos homosexuales son condergaos pola llei, en dalgunos d'ellos con cadena perpetua. En siete países, la pena de muerte pue ser aplicada. Ya inclusive cuando la homosexualidá nun tea considerada nel códigu penal, les discriminaciones y agresiones físiques tán presentes en numberosos países”, señalen.

“Inda queden importantes bolses de homofobia ente xente que nun ye capaz d'entender que'l respetu a los Derechos Humanos inclúi a la población LGTB”, apunta Xega. Del mesmu mou, solliñen que les discriminaciones afeuten entá más a les persones transexuales, “particularmente espuestes”, y a les lesbianes, “marcaes pola invisibilidá”.

Recuerden que n’Asturies ta produciéndose un avanze nos derechos LGTB, “pero convien recordar les diverses denuncies presentaes l'añu anterior, qu'afeutaron a pareyes de lesbianes y gais, persones transexuales y testimonios d'adolescentes a los que dende les sos families acosen o agreden si faen pública la so diversidá afeutivosexual”.

Poro, el coleutivu pide polítiques concretes que solucionen los problemes de calter educativu, los riesgos d'esclusión social y prevengan les agresiones que sufre la población LGTB en dellos ámbitos.

Tamién piden a la ciudadanía comprometida cola plena vixencia de los derechos humanos, qu'aproveche esti día “pa facer vivir la esperanza, la diversidá y la paz nel mundu, ensin distinción de nengún tipu de discriminación que tenga'l so orixe na orientación sexual o la diversidá de xéneru”.