Román Álvarez: “L’asturianu tien que ser oficial y llegará a selo”

Román Antonio Álvarez González (Avilés, 1951), miembru del PSOE avilesín, llicenciáu en Xeografía y Hestoria, anguaño ye conceyal de Cultura y Deportes nel tercer conceyu del país.

¿Cómo ve la situación de la llingua n’Avilés?

Avilés tuvo unes circunstancies especiales a mediaos del sieglu pasáu, cola instalación d’Ensidesa y la inmigración de xente de fuera d’Asturies. Eso fixo que se desdibuxara un poco l’asturianía de la xente. Sicasí, los mozos d’anguaño va intengrándose cada vez más na cultura asturiana, lo fíos y nietos d’esos emigrantes identifíquense dafechu colo asturiano. Un exemplu ye que cada vez más xente escueye llingua asturiana nos colexos ya institutos o l’aprobación de la toponimia tradicional, aprobada por unanimidá y que nun xeneró nengún conflictu na cai.

¿Cuándo van entamar col procesu de señalización de la nueva toponimia?

Namás que s’apruebe en Conseyu de Gobiernu entamaremos cola toponimia, vamos poner tamién los nomes de toles places y cais n’asturianu.

¿Les actividaes que s’empobinen dende los Servicios de Normalización, nun tán quiciabes más dirixíes a la promoción cultural qu’a lo que ye la propia normalización; conservar y aumentar el númberu de falantes?

Nes Xuntes d’Escolinos los neños faen una montonera d’actividaes col asturianu como ferramienta. Amás d’esto, dende la Estaya de la Llingua d’Avilés entamen cursos d’asturianu p’adultos, trabayamos nos colexos y facemos campañes col comerciu. Ye un trabayu de dir empapando poco a poco na concencia de la xente, habrá un momentu qu’esi trabayu dará los sos frutos y fairá posible facer coses más importantes.

Nel últimu númberu de la revista municipal, ‘El eco d’Avilés’, la presencia del asturianu ye nula.

A vegaes hai que vixilar al que lo fai. Al nun haber vezu d’usar l’asturianu, si nun tamos enriba pasen estes coses, nun s’alcuerden nin de qu’esiste l’asturianu. Ye’l peligru que tien la nuestra llingua, desapaecer por nun usala. Ye un fallu, nun pasará más.

En Xixón, onde tamién gobierna’l PSOE con IU, hai unes Ordenances municipales d’usu del asturianu. ¿Tienen pensáu facer dalgo asina n’Avilés?

Aprobamos la toponimia, que tamos esperando la so aprobación definitiva, vamos dando pasos nesi sentíu. Hai una sentencia del Tribunal Constitucional que diz que cualesquier persona pue dirixise a l’Alministración n’asturianu. Esto da pie a siguir avanzando nesi camín, nós queremos siguir avanzando.

N’Avilés ta construyéndose’l Niemeyer, un centru cultural que quier asitiar la ciudá dientro de la cultura universal. ¿Nun se pon muncho enfotu nestos proyeutos cuando se dexa de llau la propia cultura asturiana?

Nun ye incompatible, el Niemeyer nun ye contra la cultura asturiana, pue ser un sitiu onde la cultura y la llingua tenga acoyida.

Pero na programación preinagural tamos viendo conciertos de flamencu mientres nun vemos música asturiana.

Tamién cantó Victor Manuel. Agora tán dandolo a conocer a nivel mundial, una vez inaguráu de xuru que tendrá presencia la nuestra cultura. La so programación nun depende del Conceyu, ta xestionáu por una fundación, pero nosotros puxaremos por que lo asturiano tenga presencia.

Ta falando conmigo n’asturianu, ¿onde deprendió a falar asina?

Yo ñací na parroquía avilesina de Miranda, los mios pas y los mios güelos falaben n’asturianu. Curiosamente los mios padrinos, que yeren castellanos, yeren los únicos del pueblu que falaben castellán. Cuando entame na escuela yo falaba como lo facíen toos na mio casa y el maestru dicíame que falará como los mios padrinos. Pa mi l’asturianu nun ye nada estrañu. Tolos asturianos, usen más o menos l’asturianu, falen con construcciones gramaticales asturianes.

¿Qué rangu llegal piensa que tendría que tener l’asturianu dientro del Estatutu?

L’asturianu tien que ser oficial y llegará a selo. Pero eso tendrá que facese cuando haya consensu social abondo. Igual que ye oficial n'otros sitios y nun pasa nada, n’Asturies tamien tien que ser oficial.

Fala de que nun hai consensu social. Sicasí les encuestes amuesen que si hai consensu social, onde nun hi consensu ye dientro del Parllamentu.

Yo ye lo que pienso, la oficialidá llegará, pero tampoco ye una necesidá que tenga que ser pal añu que vien porque va acabase’l mundu. Hai que dir trabayando pa que nun se pierda, poco a poco, promocionándolo, esto dirá propiciando que la fruta vaya madurando.

¿Por qué son los dirixentes socialistes tán contrarios a la oficialidá?

Nun creo que seya asina, yo aceptó les decisiones del mio partíu. Pero’l PSOE nun ye contrariu a la llingua, los avances más grandes de la llingua vinieron de la mano de los socialistes. Otra cosa ye que seyan contrarios a la oficialidá. Esto, quiciabes, tien que ver col mieu a que detrás de la llingua haya movimientos que busquen otra cosa. Tamién que la oficialidá seya un gastu mui grande, nun sé dicite. Pero nun pienso qu’esti partíu nel que toi seya contrariu a la llingua, quierse muncho y faise muncho por ella.

L’Intercélticu d’Avilés ya arregló la so delda cola SGAE. ¿Va intentar qu’esti añu haya una programación unificada y non dos festivales al empar, como paso l’añu pasáu?

El problema del añu pasáu vino poles sentencies xudicales y una manera de facer unillateral de la organización que produxo un divorciu col Ayuntamientu, que ye’l que pon perres y medios. Lo lóxicu sería qu’esti añu seya posible que namás haya una programación y facer una fiesta de tola cultura del Arcu Atlánticu ensin polémiques. Yo toi dispuestu a dar pasos, esperemos que la otra parte quiera facer lo mesmo.